Kryeministri Rama tha se dhe ai do dilte në protestë në një rast të ngjashëm siç ai i humbjes nsë jetës së 25-vjeçarit Klodian Rasha nga arma e shtetit, porse në tjetër formë do protestonte.
“Qeveria jonë mund të ketë 1000 arsye për tu kontestuar por kjo mund të bëhet vetëm me protestë paqësore dhe votë. Asnjë qeveri nuk e ka gjithmonë të drejtën me vete. E drejta e protestës është e padiskutueshme por kjo nuk do të thotë që ata kanë gjithmonë të drejtë. Aty ndahen qeveritë demokratike dhe me ato që mund të jenë zgjedhur demokratikisht. Aty ndahet qeveria jonë me atë të mëparshme.
Ishte e drejtë që qeveria të kërkonte ndjesë, jo se kishte gisht në atë që ndodhi por sepse djalin 25-vjeçar e vrau arma e shtetit. Edhe unë të mos isha kryeministër do kisha dalë në protestë, por jo për t’ju hedhur në fyt policëve por për të dëshmuar indinjatën qytetarisht, për të dëshmuar vendosmërinë qytetare për të kërkuar drejtësi”, theksoi i pari i qeverisë në një dalje për mediat.
Rama sqaroi dhe termin “aksidental” në rastin e akordimit të një pensioni finnanciar për familjen Rasha.
“Kjo është një nga çorbat që keni bërë ju. Një çorbë që ka trazuar shpirtrat e njerëzve, ose nga qëllimi i keq ose nga padija.
E para nuk është akt normativ, është një vendim qeverie.
E dyta, pikërisht pse qeveria nuk është gjykatë dhe pse nuk mund të marrë përsipër të bëjë rolin e gjykatës, është përdorur thjesht dhe vetëm një term juridik, teknik, për të përcaktuar arsyen e dhënies së pensionit. Dhe është thënë ‘aksidentalisht’ nga veprimi i forcave policore. Kjo do të thotë që pensioni që humbi jetën tragjikisht nuk ka qenë objekt i ndonjë misioni policor por ka humbur jetën në kushtet e një përplasje aksidentale.
Kjo nuk përcakton që personi është vrarë me një plumb që ka ardhur nga qielli, thjesht përcakton që humbja e jetës është rezultat i një përplasje aksidentale.
Pastaj, në këtë përplasje aksidentale që s’ka qenë pjesë e një operacioni, s’ka qenë i lidhur me një zinxhir komande, dhe pikërisht për të mos marrë përsipër për të bërë gjykatën, por thjesht për të dhënë atë kontribut, atë pension, që është shprehje e solidaritetit me familjen, shprehje e motivit si ne e kuptojmë këtë detyrë kur themi: Ti nuk do të jesh kurrë vetëm!
Është trajtuar me këtë tekst. S’ka lidhje me aksidentin në kuptimin e vendosjes së një fjale përfundimtare në lidhje me çështjen gjyqësor”, argumentoi Rama.
Në gjykimin politik mbi protestat me minorenë, Rama tha se pas tyre nuk qëndronte Basha.
“Mua më vjen keq për Lulzim Bashën. Është një tjetër rast që ai është një lider pa pikë karakteri. Basha nuk ka asnjë lidhje me ato që ndodhin. Kjo nuk e pafajëson por e bën dyfish fajtor.
Duhet të dilte të thoshte se kjo nuk është rruga e duhur, pasi duhet të shkojmë në votime.
Kjo që ndodh nuk është gjë tjetër veçse akt degradimi i Ilir Metës dhe Sali Berishës. Këto janë pas asaj. Këto kanë predikuar revolucione. Këtë e dinë dhe peshqit e Liqenit Artificial. Secili nga ju e di këtë që po them unë tani. Këtë e di çdo shqiptar, i majtë apo i djathtë”, tha Rama. /tesheshi.com/
