Kryeministri Rama tha se ai nuk po e akuzon Bashën se ka bërë këtë apo atë gjatë punësimit të tij në Kosovës, siç dhe pretendohet nga disa dëshmitarë, porse kërkon nga ai që të sqarojë pozicionin e tij në ato që thuhen për të.
“Një përfaqësues i një familje, siç e ka gjithë gjithësecili, i një organizate, media, për më tepër një përfaqësues i një numër të caktuar qytetarësh, i një partie poltike, e që për më tepër pretendon të qeverisë vendin, ka për detyrë të mbajë qëndrime dhe të thojë atë se çfarë lidhet me të , sepse këtu nuk po flasim për punët private, por për një detyrim shumë të thjeshtë, që një lider ka, të shpjegohet dhe patjetër që në këtë rast unë jam, aspak i dëshiruar që këto akuza që nuk i bëj unë, por njerëz që si njoh fare të mos jenë të vërteta, por është detyrim i patjetërsueshëm, nuk mund të ngrihet duke më sharë mua, as të nxjerrë partinë, se kjo është individuale”, arsyetoi Rama në një dalje për mediat, në fakt me tjetër tematikë, siç është “Ekonomia në fokus”, ku do fliste për investimet në furnizimin me ujë të pijshëm 24 orë në disa qarqe të vendit.
Rama vijoi duke thënë se “në pozicionin që unë kam, e kam detyrim t’i them shpjegohu, sepse nëse PS në kohën kur e ka drejtuar Nano nëse do kishte mbajtur një qëndrim të tillë, unë sot do jepja shpjegim megjithëse atëherë nuk e drejtoja unë PS.
Edhe Basha duhet të thotë pse. Le ta thotë pse e ka votuar pro raportin e Dick Martyt-, pse bashkë me LSI votuan pro, le ta thonë. Këto janë thjesht në funksion të detyrës që kam, dhe të tjerat janë dokrra që kjo është pjesë e fushatës e me radhë.
Dikush që pretendon të drejtojë shtëpinë tonë, le ta thotë, kam bërë këtë ose atë, kjo qëndron dhe kjo jo.
Por nuk mund të thuhet që kjo është komplot i Ramës me Top Channel, apo se Rama këtë e bën gjthmonë, këtë se thotë dot Basha në kushtet kur i duhet të shpjegojë se çfarë ka bërë, jo çfarë kam bërë unë. Në gjithë botën demokratike funksionon kështu pra llogaridhënia”.
Për të parin e qeverisë, kjo është e rëndësishme në funksion të karakterit të të akuzuarit.
“Unë nuk jam hetues dhe s’më intereson fare të jem. Kjo është çështje karakteriale e rëndësishme, që testohet gjithmonë para njerëzve. Ai duhet të dalë të përballet me çdo çështje që ka interes publik dhe jo më me atë që ka lidhje me të.
Të ikësh, të bishtnosh, të bësh fletërrufe me partinë, nuk është mirë. Në fund të fundit ne jemi të gjithë në sytë e njerëzve”, theksoi Rama.
Kujtojmë se ditët e fundit, për shkak të asaj që po ndodh në Hagë, ku krerë të UÇK-së po përballen me akuzat për krime lufte, ka ridalë në pah një pozicion kompromentues i Bashës kur ai ishte i punësuar në Kosovë pranë UNMIK-ut. Ndaj tij, janë dy shtetas kosovarë që kanë ngritur akuza, për dy problematike lufte. /tesheshi.com/
