Kokëkuqja italiane bëri një paraqitje tjetër për të ardhur keq në Hockenheim. Vettel e mbylli garën i pestë, me më tepër se 32 sekonda pas fituesit, Lewis Hamilton-it. Akoma më keq për Raikkonen-in, që erdhi pas gjermanit, i gjashti, me 37 sekonda diferencë me pilotin e vendit të parë.
Ferrari ka humbur për momentin dhe garën me Red Bull-in për konstruktorë. Red Bull-i ka kaluar në vend të dytë në renditjen e përgjithshme të konstruktorëve, me 256 pikë, duk zbritur një vend më poshtë Ferrari-n, që ka 242 pikë.
Vettel prej kohësh nuk është i kënaqur me ecurinë e skuadrës, por është Raikkonen ai që flet hapur.
Finlandezi është treguar i drejtpërdrejtë pas garës së djeshme në Gjermani: “Çdokush mund ta shohë ku përfunduam, dhe kjo është dukshëm paksa e dhimbshme për të gjithë ne.”
“Ne ishim përpara Red Bull-it; tani Red Bull-i ka kaluar para nesh,” thotë ish-kampioni i botës.
Raikkonen është i katërti në renditjen botërore të pilotëve të Formulës 1, por i arritshëm për të është vetëm vendi i tretë në të ardhmen e afërt, asgjë më shumë, përkundër synimeve të fillimsezonit.
“Duhet të punojmë fort dhe të përmirësohemi. Ne mund t’i sfidojmë ato (Mercedes-in dhe Red Bull-in), por nuk do të jetë e lehtë.”
Ferrari nuk shpallet kampion për konstruktorë që nga viti 2008, kur për të pilotonin Kimi Raikkonen dhe Felipe Massa. Me formën që po tregon makina italiane, nuk duket e afërt dita e një triumfi të pritshëm. /tesheshi.com/
