Nga Entela Duraj
Secili prej nesh në ditët e sotme ka shumë pak kohë të lirë në dispozicion mes morisë dhe listës së gjatë të gjërave që duhen mbyllur brenda një dite, por pavarësisht kësaj lexuesit e vërtetë arrijnë ta gjejnë kohën për të lexuar libra. Botimet bashkëkohore të emrave më të njohur të letërsisë shqipe dhe asaj të huaj nuk kanë munguar asnjëherë në libraritë shqiptare, ato janë gati dhe presin vetëm lexuesit. Ne po ju sjellim sot disa nga botimet më të reja që mund t`i gjeni kudo nëpër libraritë shqiptare….
“Kukulla”, romani i Kadaresë kushtuar nënës
Një vepër e shkruar në tri kohë, për të shkuarën, të tashmen dhe për të ardhmen, libri i Kadaresë tërhoqi dukshëm vëmendjen e lexuesit, duke u kthyer në një best seller, në kohën kur doli, e megjithatë “Kukulla” ishte ajo pjesë që ka prekur më së shumti lexuesin me ndjeshmërinë, dhembshurinë, dashurinë dhe sinqeritetin me të cilin ishte shkruar. Nëna e tij? Një kukull. E brishtë, e lehtë si një kukull letre”. Kështu fillon teksti i studjuesit francez, që përfaqëson tonin pozitiv të jehonës së veprës në shtypin tjetër letrar. Kritiku më i njohur i Francës, Bernard Pivot, e ka përshëndetur veprën më 17 maj 2015, në “Le Journal du Dimanche” të Parisit. Vetëm disa javë pas botimit dhe suksesit në Shqipëri të librit “Mëngjeset në Kafe Rostand”, ku përfshihet romanit “Kukulla” , shtëpia botuese “Fayard” e Parisit e përktheu dhe e botoi veprën në frëngjisht, për publikun francez dhe ndërkombëtar. Një lajm i tillë konfirmon faktin se letërsia shqipe bën pjesë tashmë me dinjitet në klubin europian të letrave. Pas suksesit në Francë, rrëfimi për nënën është botuar si roman edhe në shqip. Nga sot, ai mund të gjendet në të gjitha libraritë, si një botim më vete, kushtuar nënës, ‘kukullës’. Libri ka 142 faqe dhe kushton 700 lekë.
“Enveri në kujtimet e mia”, Teuta Hoxha
Teuta Hoxha, nusja e djalit të madh të Enverit, Ilir Hoxhës, hap dyert e shtëpisë më të njohur në Shqipëri, përmes librit që do të jetë në duart e lexuesit shqiptar: “Enveri në kujtimet e mia”. Nga njohja me Ilirin, takimi i parë me Enver Hoxhën, shëtitjet, bisedat intime, marrëdhënia me pjesëtarët e tjerë të familjes, fejesa e djalit të Mehmet Shehut, vitet e post ’90-ës dhe letra e panjohur e Nexhmije Hoxhës janë disa nga pjesët e këtij libri me kujtime, që veç tyre bazohet dhe në ditarët personalë të Enverit dhe Nexhmijes. Vetë Teuta Hoxha shprehet se ky libër mund të jetë nesër i vlefshëm edhe për ata që do të shkruajnë mbi figurën e Enverit, por mbi të gjitha ky libër i dedikohet nipërve të saj, që kur të rriten ta njohin, përmes rrëfimit të gjyshes së tyre historinë e familjes Hoxha, dhe stërgjyshërit Enver dhe Nexhmije Hoxha. Libri ka 317 faqe dhe kushton 1200 lekë.
“Historia e letërsisë shqipe: çështje të hapura”, nga Prof.Shaban Sinani
Debati për historinë e letërsisë shqipe: Prof. Shaban Sinani parashtron formulën e tij përmes botimit më të ri: “Historia e letërsisë shqipe: çështje të hapura”, botimet “Naimi”, Tiranë 2015. Rishkrimi i historisë së letërsisë, si dhe i çfarëdo historie tjetër, është një proces i ligjshëm, sepse çdo brez ka të drejtë ta rishkruajë historinë. Gjatë dy dekadave të fundme brezi i ri i studiuesve ka arritur të shqiptojë refuzimin e historive tradicionale të letërsisë, të përkufizojë domosdoshmërinë e rishkrimit të saj, të penalizojë brezin e vjetër të studiuesve të letërsisë dhe shumë të tjera arritje, por ende pa e shprehur vullnetin e vet në një projekt ndryshe. Nëse është e mundshme një histori e re e letërsisë shqipe, që i tejkalon kufijtë e ngatërruar kohorë, politikë, metodologjikë dhe ideologjikë, si mund të hartohet ajo?! Prof. dr. Shaban Sinani propozon formulën e tij për këtë problem përmes librit më të ri “Historia e letërsisë shqipe: çështje të hapura”, botimet “Naimi”, Tiranë 2015. Libri ka 320 faqe dhe kushton 1000 lekë.
Dy fjalor të rinj anglisht-shqip
Dalin në treg dy fjalorë të rinj të anglishtes të vlefshëm me shembuj idioma, kryesisht për arsimin e mesëm. Dy fjalorë të përshtatshëm jo vetëm për nxënësit e arsimit të mesëm por edhe për këdo tjetër, studentin, nëpunësin dhe të interesuarin për gjuhën angleze dhe shqipe. Me rreth 600 faqe secili libër kushton 1500 Lekë. Fjalorët kanë nga 40 mijë fjalë dhe rreth 100 mijë shembuj e idioma. Ato janë përgatitur nga Pavli Qesku.
Libri i ri i gazetarit Besnik Dizdari, “Kupa e Botës dhe Shqipëria”
E vërteta është se Besnik Dizdari, gazetari i njohur, sot editorialist i “Panorama Sport”, ka botuar më parë pesë libra për Kupën e Botës. I pari më 1990, siç e thotë ai vetë, një botim me një letër të nivelit të ulët, me një pamje jo aq tërheqëse, por që megjithatë për të ai ka dobësinë si për çdo fillim. Por botimi i librit të gjashtë për Kupën e Botës këto ditë (“Botimet Kumi”) është pa dyshim më i veçanti. Kanë kaluar plot 25 vjet dhe libri “Kupa e Botës dhe Shqipëria” i vitit 2015, natyrisht në konceptimin e tij modern si një histori enciklopedike e 20 Botërorëve është diçka krejt tjetër. Pasqyrimi i Kupës së Botës “Brazil 2014”, historia statistikore e saj, kapitulli i gjerë historik i “rekordeve” për të gjithë 20 edicionet e Kupës së Botës (1930-2015) përbëjnë një unitet. Pastaj pjesa e dytë e librit me Shqipërinë e 50 vjetëve të saj në kualifikimet e Kupës së Botës, një analizë përshkruese e gjithë pjesëmarrjeve të saj, duke pasur në fokus edicionin e fundit, është po aq në unitet. Lexuesi do të gjejë krejt historinë statistikore të Botërorëve, por dhe të Kombëtares së Shqipërisë në këto 50 vjet pjesëmarrjeje. Është një libër me plot risi. Libri ka 213 faqe dhe kushton 1400 lekë.
“Unë banoja në Tiranë” nga Arben Imeri
Autori jeton në Itali, që prej 24 vitesh. Libri i parë që boton. Tema është qyteti i humbur…malli për vendin e lindjes…i terguar përmes ngjarjesh të vërteta. Kryesisht, ngjarje të ndodhura para viteve 90… Një shok që arratiset, një jetim që bie në burg…një djalosh që për të realizuar ëndrrat e tij, jep gjak… shoqëria që bën çmos për tu larguar nga Shqipëria, në vitet 90-91…aventura… “Kur kthehem në Shqipëri, qytetin tim e njoh vetëm nga mali i Dajtit. Sapo nga dritarja e avionit e shquaj atë, trupi më mbushet me mornica, fyti më mblidhet dhe zemra më rreh fort. Padurimi pushton qenien time. E kuptoj që kam akoma një atdhe, një shtëpi. Edhe pse i ikur e i harruar, nuk ndihem i vetëm. Dua të zbres sa më parë nga avioni dhe me zë të lartë të thërras: “Ej, erdha unë!”… Libri ka 238 faqe dhe kushton 800 lekë. /tesheshi.com/
