Një qytet i vogël në Guatemalë ka ndaluar përdorimin e të gjitha produkteve plastike. Banorët e kësaj zone po i mësojnë një vendi të tërë, se me vendosmërinë e duhur mund të bëhet ndryshimi i madh. Ata i kanë zëvendësuar qeset dhe enët plastike me peceta pëlhure, shporta të endura dhe gjethe bananeje.
Duke folur për këtë nismë të tyre, artizania Berta Angela thotë: “Edhe më i varfri mes nesh ka peceta pëlhure tradicionale, që mund t’i përdorë për të blerë tortile apo bukë. Çdo kompozim që u bëjmë këtyre pecetave është një pasqyrim i mendimeve, ideve dhe kulturës tonë.”
Një përfaqësuese e shoqatës së tregtisë në këtë zonë, C. Rocche thotë: “Kur trastat e letrës dalin jashtë përdorimit, ato mund të riciklohen lehtë. Kurse qeset plastike nuk kalben dhe shkaktojnë helmime. Ne mund t’u rikthehemi praktikave të paraardhësve tanë, të cilët nuk i përdornin produktet plastike.”
Edhe peshkatarët e zonës janë angazhuar në pastrimin e mbeturinave në brigjet e liqenit Atitlan. Njëri prej tyre, Nicolas Tumax, thotë: “Disa prej miqve të mi më quajnë “revolucionari”. S’po na detyron askush ta bëjmë një pastrim të tillë. E bëjmë falas, madje vëmë në përdorim edhe të ardhurat tona. Çdo vit, ne heqim rreth 600 -700 thasë me mbeturina nga liqeni.”
Qyteti ka krijuar gjithashtu edhe një sistem të vetin për të klasifikuar dhe ricikluar të gjitha mbeturinat e tij. Ky projekt nuk gjeneron as vota dhe as të ardhura. Kjo është edhe arsyeja se pse në nisma të tilla përfshihen krejt pak komunitete.
Ligji i këtij qyteti, i miratuar me shumicë votash në vitin 2016, jo vetëm që ndalon përdorimin e qeseve dhe enëve plastike, por dënon me gjobë çdokënd që e thyen atë.
Kryetari i Bashkisë së qytetit San Pedro de Laguna, Mauricio Mendez, thotë: “Në më pak se një vit kemi ulur përdorimin e plastikës në 80%. U kemi shkuar njerëzve derë më derë për t’i ndërgjegjësuar dhe për t’i edukuar mbi rolin e rëndësishëm që ka secili prej tyre në shpëtimin e planetit tonë. ”
Shoqata e Produkteve Plastike të Guatemalës e ka konsideruar një ndalim të tillë si jokushtetues dhe ka bërë ankesë zyrtare ndaj tij. Megjithatë, qyteti e vazhdon nismën e tij dhe shpreson të shërbejë si frymëzim edhe për qytetet e tjera për zbatimin e projekteve të ngjashme.
“Ne duhet të ndjekim zërin e ndërgjegjes në vend të zërit të partive politike. Nëse jemi të bindur se kjo nismë është në të mirë të mjedisit tonë, atëherë s’do të jetë e vështirë për ta vazhduar” – shprehet C. Rocche, përfaqësuese e shoqatës së tregtisë në këtë qytet. /tesheshi.com/
https://www.facebook.com/ajplusenglish/videos/1180563518751820/?t=115
