Vendet e Europës Lindore po akuzojnë kompanitë e mëdha se në këto vende dërgohen ushqime me cilës të ulët.
Rumania iu bashkua shteteve që kanë bërë thirrje Bashkimit Europian që të trajtojë me prioritet përdorimin e “standardeve të dyfishta” nga zinxhirët ushqimorë globalë, për të shitur prodhime me cilësi të ulët në Europën Lindore.
“Ne duhet të dimë se cilat kompani na trajtojnë si shtetas të dorës së dytë”, tha Kryeministri rumun, Mihai Tudose.
Shtete të Europës Lindore, duke përfshirë Poloninë, Hungarinë, Sllovakinë, Bullgarinë, Kroacinë dhe Rumaninë, akuzojnë zinxhirët globalë të ushqimit për përdorimin e kësaj metode për të shitur prodhime të një cilësie të ulët në vendet e tyre. Ata duan që Komisioni Europian të japë zgjidhje të cilat të ndryshojnë mbrojtjen e konsumatorëve të bllokut dhe ligjet e sigurisë ushqimore., raporton monitor.al.
Kompanitë e mëdha të ushqimit kanë pranuar se është e zakonshme që të përdoren përbërës të ndryshëm për produkte me të njëjtin emër në vende të ndryshme, por këmbëngulin që produktet e tyre të ndryshojnë për t’iu përshtatur shijeve lokale, sesa për të ulur kostot.
Ministri rumun i Bujqësisë, Petre Daea, u shpreh se sipas një studimi të kryer së fundmi, nga 29 produkte ushqimore të shitura në Holandë, Gjermani dhe Belgjikë, “nëntë prej tyre ishin të ndryshme në Rumani, pra ndryshonin nga produktet e shitura në Perëndim”.
Studimi, i cili u krye nga një agjenci shtetërore shëndetësore, tregoi përmbajtje të ndryshme të kalorive në disa lloje të konservave të peshkut apo dhe produkteve të mishit të derrit. Ekspertët theksojnë se asnjë nga nëntë produktet nuk ishin të përshtatshme për konsum, por vënë në dukje mungesën e korrelacionit mes etiketave në Europën Perëndimore dhe atë Lindore.
Teste janë bërë dhe në shtete të tjera.
Bullgaria, e cila ishte ndër vendet e para lindore që nisi vënien në praktikë të testeve të tilla, deklaroi në fund të qershorit se ekspertët gjetën përbërës të ndryshëm ushqimorë për produkte të së njëjtës markë të shitura në vendet lindore në krahasim me ato perëndimore, si në Gjermani apo në Austri.
Ministri bullgar i Bujqësisë, Rumen Porozhanov, tha se analizat laboratorike kishin gjetur përbërës të ndryshëm në shtatë nga 31 artikuj identikë të shitur në Bullgari.
Ekspertët zbuluan se 16 prej këtyre produkteve ishin shitur me çmime më të larta në shtetin më të varfër të Bashkimit Europian, tha më tej ai.
Kreu i Komisionit Europian, Jean Claude Juncker,u takua me kryeministrat e këtyre vendeve dhe mirëpriti shqetësimin.
“Mua nuk më pëlqen ideja e qytetarëve të dorës së dytë në Europë dhe ne si Komision po punojmë fort në këtë drejtim”, vijoi ai./tesheshi.com.
