Shkurt dhe pa shumë gjuhë të sforcuar akademike, akademik Rexhep Qosja i është qasur në mënyrë kritike Dialogut mes Prishtinës dhe Beogradit, duke nisur që nga vetë fjalë – “dialog”. Sipas një zbërthimi etimologjik që Qosja ia ka bërë kësaj fjalë në kontekstin politik, ajo nuk është e duhura.
“Në dramën e sotme teatrore e politike mes Prishtinës e Beogradit politikanët dhe intelektualët e Kosovës dy gjëra më në fund do të duhej t’i kishin të qarta:
E para, mes Prishtinës e Beogradit nuk bëhet dialog: dialogu bëhet mes dy vetëve apo grupeve për punë të ndryshme, kur e kur serioze e kur e kur joserioze. Mes Prishtinës e Beogradit ka kohë që po bëhen e do të bëhen bisedime zyrtare, politike dhe diplomatike shtetërore. Vetëm duke i quajtur këto bisedime shtetërore e jo dialog ne e ruajmë dinjitetin shtetëror të Kosovës”, shkruan Qosja në FB.
Më pas, kritika e tij u adresohet atyre zërave në skenën politike, që spas tij kanë gjetur kohën më të paduhur për të goditur UÇK-në. Dhe këtu, ai përmend emrin e Nexhat Dacit, ndërsa të tjerët i lë të nënkuptuar.
“E dyta, në pazarin e sotëm të bisedimeve zyrtare, politike e diplomatike shtetërore mes Prishtinës e Beogradit nuk dilet me deklarimet politike nënshtruese, mohuese ndaj luftës së Ushtrisë Çlirimtare te Kosovës, që ishin përmbajtje e mendimeve të Kryetarit të LDK-së Ibrahim Rugova dhe argatit të tij Nexhat Daci. Historia mund të falsifikohet siç po falsifikohet sot nën dhunën e terrorin politik të oligarkëve politikë e të partive e ç’drejtuesve te tyre, por s’mund te falsifikohet përgjithmonë”, shkruan akademik Qosja. /tesheshi.com/
