Deklarata e Nikozisë ishte akti final i takimit trepalësh të zhvilluar dje në kryeqytetin e Qipros mes vendit mikpritës, Greqisë dhe Egjiptit.
Udhëheqësit e tre vendeve, presidenti qipriot, Nikos Anastasiadis, kryeministri grek, Aleksis Cipras, dhe presidenti egjiptian, Abdulfettah es-Sisi, u pajtuan të thellojnë më tej marrëdhëniet dhe bashkëpunimin mes tyre në fushat e ekonomisë, tregtisë, turizmit dhe energjisë.
Pas takimit të ngjashëm në Egjipt gjashtë muaj të shkuar, ky ishte bashkimi i dytë kokë më kokë mes zyrtarëve të lartë të tre shteteve.
Presidenti qipriot e quajti Deklaratën e Nikozisë një “pikë reference” për përparësitë e tre vendeve, dhe i cilësoi dialogun dhe bashkëpunimin tripalësh si nxitës të paqes, qëndrueshmërisë dhe sigurisë në rajonin e Mesdheut lindor.
Një vend të veçantë në bisedimet zunë dhe çështja qipriote, vala e fundit e emigracionit, dhe terrori.
Presidenti egjiptian deklaroi se vendi i tij ishte i interesuar për unitetin e popullit qipriot, për sovranitetin, integritetin dhe pavarësinë e Qipros.
Në takim u diskutua dhe çështja e kufijve detarë mes tre vendeve, ndërsa Cipras lajmëroi fillimin e konsultimeve.
