Lulzim Basha, ditët e fundit pas dy takimeve radhazi me Ilir Metën ka shpeshtuar kërkesën e tij për një “qeveri teknike” deri në zgjedhje, pasi sipas kreut të PD-së, kjo forcë politike nuk ka besim të Edi Rama.
Por nëse i hedhim një sy Komisionit Qendror të Zgjedhjeve, Partia Demokratike jo vetëm kontrollon institucionin me 4 anëtarë që është shumica absolute, por ka edhe kryetaren, Lefteri Lleshi (Luzi).
Megjithatë, Basha është mjaft insistues në kërkesën e tij de e ka vendosur si ultimative, pra PD nuk do të hyjë në zgjedhje nëse nuk ikën Edi Rama.
Pse e bën këtë kërkesë kreu i opozitës kur edhe zëra brenda partisë së tij, si Genc Ruli, e kanë quajtur të ekzagjeruar?!
Basha, me kërkesën e largimit të Edi Ramës, përveç se mban nën presion mazhorancën, e vë në mes kryeministrin, të cilit edhe aleati i tij kryesor, Ilir Meta, i kërkon rrëzimin e qeverisë.
Mirëpo Rama, siç theksojnë shumë qarqe, ka arritur të sigurojë 74 vota për të qeverisur edhe veten, ku llogarit përveç PDIU-së edhe disa deputetë të LSI-së, si dhe krerët e partive të vogla të djathta përveç Fatmir Mediut.
Nëse ndodh kjo, defaktorizohet shumë LSI-ja e Ilir Metës por edhe opozita e Bashës që ka bërë gjithë këtë luftë për largimin e Ramës.
Kryeministri shkon i vetëm në zgjedhje me barrën e realizuesit të reformës për drejtësi dhe përballë ka dy kundërshtuesit e saj, si Basha dhe Meta.
Nëse në 2013-n Rama e kishte të domosdoshëm një aleancë me Metën, sepse ndryshe mund të humbte sërish, kësaj radhe i leverdis më shumë të jetë pa kreun e LSI-së.
Me një fjalë, Edi Rama e ka erën e detit me vete.
Ndaj synimi i Bashës është që t’ia prishë Edi Ramës këtë favor dhe ta identifikojë atë si njeriun që mund të prishë zgjedhjet e vitit të shkuar.
Por një qeveri teknike siç e kërkohet me instistim kryeministrit, mund të zgjidhet vetëm me konsensus, pra nga të gjitha forcat politike dhe në rast krizash specifike si ai i vitit 1991 apo 1997-ës.
Një qeveri teknike në Kuvend pas PS-në nuk i ka votat, ndaj ajo nuk mund të quhet një kabinet ekspertësh por një kabinet PD plus LSI, që është një qeveri e pastër politike.
Në vitin 2013, kur Meta lagohet nga qeveria e Berishës, Rama kishte bërë gati kërkesën që të shkonte në zgjedhje pa qeverinë “Berisha” duke kërkuar një kabinet kujdestar që do ta mbështeste PS dhe LSI.
PD-ja në atë kohe kishte 68 vota si mazhorancë. Mirëpo Berisha me një manovër të shpejtë, i mori PS-së Kastriot islamin, Asllan Dogjanin dhe Gjovalin Kadelin, të cilët i bëri deputetë të PD-së, duke mbijetuar deri në zgjedhje… /tesheshi.com/
