Në prag të nisjes së vitit të ri shkollor, ministri i Rendit Taulant Balla prezantoi planin e ri të sigurisë në shkolla, duke garantuar prindërit se këtë vit, ata duhet të ndihen më të siguritë se kurrë për fëmijët e tyre gjatë procesit mësimor.
“Policia e Shtetit ka detyrën e garantimin e sigurisë publike në të gjitha format e saj. Kur prindërit, gjyshërit t’i çojnë fëmijët në shkollë, ata ja besojnë fëmijët shtetit. Në të gjitha institucionet private apo publike, kudo që t’i kenë të regjistruar. Kur i dorëzojnë, dhe kur do t’i dorëzojnë fëmijët tek dera e shkollës, prindërit duhet të jenë këtë vit, më të sigurtë se vitin e shkuar se asnjë problematikë, asnjë gjë e keqe mund t’ju ndodh atyre, jo vetëm brenda, por edhe përreth mjediseve të shkollës ku ata natyrishëm kalojnë kohë të gjatë dhe pas orarit të mësimit”, vijoi Balla, ku veçoi caktimin e perimetrit të sigurisë.
“Strukturat vendore të Policisë së Shtetit, në bashkëpunim me Bashkitë, do të identifikojnë dhe përcaktojnë Perimetrin e sigurisë së çdo shkolle, sipas vlerësimit të situatës në terren, por në çdo rast jo më pak se 50 metër rreth gardhit kufizues të secilës shkollë”, tha ai, duke shtuar:
“Bashkë me kolegen time ministren Kushi, duam të përcjellim një mesazh shumë të qartë: Askush nuk duhet të guxojë të kryejë veprime të paligjshme brenda perimetrit të sigurisë së shkollave”.
Duke prezantuar planin e sigurisë, ministri Balla tha se është i ndarë në shtatë pika.
Pika e parë është siguria publike, ku sipas Ballës, do të propozohen ndryshime ligjore për ashpërsimin e dënimeve për veprat penale brenda perimetrit të sigurisë së shkollave.
“Së pari, do të normojmë përkufizimin e konceptit të Perimetrit të Sigurisë në shkolla si ato hapësira fizike përreth shkollave, ku fëmijët qëndrojnë, ndërveprojnë dhe kalojnë pjesë të kohës së tyre para apo pas mësimit e që përfshin rrugët dhe rrugicat përreth kufijve të shkollës si dhe të gjitha aktivitetet tregtare (dyqane, kioska, njësi biznesi) që ushtrohen brenda kësaj hapësire”, tha Balla.
Në prezantimi e në plani të ri sigurie, ministri Balla tha se “objektivi ynë kryesor është parandalimi i kriminalitetit dhe i përdorimit të substancave narkotike në radhët e të rinjve, si dhe goditja pakompromis e rrjetit të shpërndarjes së drogës në perimetrin e sigurisë në shkolla e në rang vendi”. /tesheshi.com/
