Ismail Morina, i njohur ndryshe si Ballisti, sipas vendimit të Qeverisë kroate është i lirë. Lajmi është dhënë nga disa portale, të cilat i referohen familjarëve të Ballist Morinës.
Meritat për lirimin e Ballistit i ka Presidentja kroate Kolinda Grabar dhe po ashtu raportet e shkëlqyera shqiptaro-kroate, raporton kumanovapress.
Sikundër raportohet, miq të Ballistit kanë ndërhyrë edhe tek këshilltari për sigurinë e Presidentes kroate, dhe se për këtë vendim pozitiv duhet falënderuar edhe Ministria e Drejtësisë së Kroacisë.
Pritet që nesër ai t´i dorëzohet Shqipërisë, dhe se nuk ka probleme ligjore nga Kroacia.
Ballist Morina u arrestua në Kroaci dhe gjykata vendosi ekstradimin e tij drejt Serbisë, e cila e kërkon për dronin e ngritur në stadiumin e Beogradit gjatë ndeshjes Serbi-Shqipëri, 3 vjet më parë.
Pas vendimit të Gjykatës së Lartë të Kroacisë, fjala e fundit për ekstradimin ose jo të Ballistit i takonte qeverisë kroate. /tesheshi.com/
