Pasi Papa Françesku e quajti vrasjen e armenëve gjatë Luftës së Parë Botërore “gjenocidin e parë të shekullit të njëzetë”, nënsekretari italian për Europën, Sandro Gozi, bëri të ditur se qeveria italiane nuk do t’i përshkruajë ngjarjet e 1915-s si “gjenocid”.
“Do të ishte e papërshtatshme për qeverinë italiane ta njohë zyrtarisht ‘gjenocidin’ armen. Nuk u takon qeverive të vendosin se ç’ngjau 100 vite të shkuara; diskutimi është çështje e historianëve.”
“Komentimi i ngjarjeve historike krijon gjithmonë ndarje të forta, kështu që qeveritë nuk duhet ta përdorin termin ‘gjenocid’,” u shpreh Gozi në një intervistë në televizionin privat italian LA7.
Gozi deklaroi po ashtu në përgjigje të pyetjes se nëse qëndrimi i Turqisë mbi ngjarjet e 1915-s mund të kishte ndikim në çështjen e hyrjes në BE, “Me Turqinë po trajtojmë problemet e së sotmes, jo të njëqind viteve më parë: të drejtat e njeriut, pakicat, dhe demokracinë.”
Fjala e Papës të dielën në Bazilikën e Shën Pjetrit, dhe përmendja e termit “gjenocid” për ngjarjet e 1915-s shkaktoi zemëratë te zyrtarët turq, e solli reagimin e tyre të menjëhershëm.
Kryeministri turk, Ahmet Davutoglu, qe i prerë në përgjigjen e tij, “Vënia në pah e vuajtjeve vetëm të njërës palë gjatë kohës së luftës dhe diskriminimi i dhimbjeve të palës tjetër nuk i shkon për shtat Papës dhe autoritetit që ai ka.”
Po kaq i ashpër qe dhe ministri turk i Punëve të Jashtme, Mevlut Çavushoglu, i cili u shpreh më herët, “Deklarata e Papës, e cila nuk ka lidhje me faktet historike dhe bazë ligjore, është thjesht e papranueshme.”
Debati nëse ngjarjet e 1915-s duhen quajtur “gjenocid” apo jo ndizet për çdo vit gjatë këtij muaji, dhe jo rrallë ka sjellë përplasje mes Turqisë dhe vendeve që kanë zgjedhur ta përdorin këtë term.
Polemika mbi “gjenocid”-in zë vend dhe në Kongresin Amerikan, dhe reflekton ndarjen mes demokratëve e republikanëve. /tesheshi.com/
