Mensur Krasniqi
Pas një debati maratonik të qeverisë në Maqedoni lidhur me Ligjin e Gjuhëve, deri në orët e vona të natës, sërish nuk u arrit një gjuhë e përbashkët për implementimin e plotë të ligjit në formën e paraparë. Kështu ministrat e qeverisë u morrën vesh që edhe më tej të vazhdojë koordinimi për implementimin e ligjit.
Siç shkruhet në njoftimin e Qeverisë, do të vazhdojë definimi i kompetencave të dy organeve të reja që do të kontrollojnë zbatimin e Ligjeve të Gjuhëve.
Dy organet e reja do të quhen “Agjencia për përdorimin e gjuhëve” dhe “Inspektorati për përdorimin e gjuhëve”.
Qeveria njoftoi se pika e Ligjit të Gjuhëve do të futet përsëri në rend dite në ndonjë pre seancave të ardhshme të Qeverisë.
Gjuha shqipe ishte temë debati edhe në seancën e sotme të Kuvendit. Sipas deputetit të Lëvizjes BESA, Zeqirija Ibrahimi mosmarrja e vendimit nga Qeveria për të sjellë Ligjin për gjuhën në Kuvend, për ne si shqiptarë shtron dilemën të cilën ata e kanë pasur që në fillim të kësaj qeverie “se a kanë pasur ndonjë marrëveshje partitë shqiptare për të hyrë në Qeveri apo marrëveshja e vetme ka qenë marrja e posteve”.
“Kjo dëshmon se gjuha shqipe ende nuk do të vijë, ndërsa partitë shqiptare do të vazhdojnë të jenë si dekor në qeveri. A mos edhe arsyeja që ata e shprehin se Ligji do të shkojë në Komisionin e Venedikut bëhet për arsye që të shtyhet pas zgjedhjeve lokale. Komisioni i Venedikut u shërben për të shtyrë sjelljen e ligjit, sipas thënies popullore “Edhe ujku i ngopur edhe dhentë në numër”, ka thënë deputeti Ibrahimi.
Ai ka shtuar se krejt kjo shtron dilemën e arsyeshme se për ç’farë kanë votuat shqiptarët, për se ata i kanë votuar partitë shqiptare dhe një dilemë për votuesit shqiptar të LSDM se, pse LSDM është kundër gjuhës shqipe?
“Lëvizja BESA do të presë deri në momentin e fundit para 100 ditëshit të formimit të Qeverisë, po mos atëherë do të propozojë ligjin e saj”, ka thënë Ibrahimi.
Lidhur me Ligjin për gjuhën shqipe në një intervistë eksluzive për portalin tesheshi gjatë ditës së sotshme ka folur edhe Sekretari i Partisë së koalicionit qeveritar, LR-PDSH-së, Arben Taravari. Ai ndër të tjerash u zotua se do ta braktisin qeverinë nëse nuk përmbushin zotimet e dhëna para elektoratit. Njëra ndër to është edhe implementimi i Ligjit për gjuhën shqipe në 100 ditëshin e parë të qeverisë.
Kujtojmë se pas hartimit të plotë të Ligjit për gjuhën shqipe, i njëjti do të përcillet në Komisionin e Venediktit për mbikëqyrje.
Marrë parasysh procedurat e gjata në këtë Komision, aq më shumë shtohet skepticizmi i implementimit të këtij ligji brenda 100 ditëshit të Qeverisë. /tesheshi.com/
