Presidenti Thaçi ka treguar edhe një herë armiqësinë e tij me Lëvizjen Vetëvendosje duke ja bërë të qartë se në asnjë rrethanë nuk do t’ia japë mandatin për formimin e qeverisë së re.
Gjatë një interviste për “Zërin e Amerikës”, kreu i shtetit kosovar tha se njerëzit të cilët kanë përdorur dhe që përdorin dhunë për realizimin e qëllimeve politike, nuk do të mund të jenë bartës të institucioneve.
Duke folur për qeverinë e re, presidenti ka thënë se ajo duhet të jetë e zotuar për vazhdimin e reformave demokratike qoftë në politikë, ekonomi apo drejtësi, si dhe të vazhdojë reformën elektorale.
“Tjetër parim që do të jetë për qeverinë e ardhshme të Kosovës apo bartësit e institucioneve, është vazhdimi i bisedimeve me Serbinë, që do të çonte drejt një marrëveshjeje të madhe politike që nënkupton normalizimin e plotë të marrëdhënieve Kosovë-Serbi dhe pajtimin e mundshëm gjithashtu edhe ndërtimin e fqinjësisë së mirë me të gjitha vendet e rajonit. Objektiv tjetër dhe parim mbizotërues do të jetë angazhimi i gjithanshëm për themelimin sa më të shpejtë të Forcave të Armatosura të Kosovës për t’u integruar në strukturat e NATO-s si parakusht për vazhdimin e partneritetit për paqe dhe pastaj edhe në NATO. Gjithashtu, parim do të jetë edhe mbështetja e fuqishme që do t’i jepet angazhimit për përmbylljen e procesit të termocentralit Kosova e Re, që është një investim shumë i fuqishëm për Kosovën dhe i nevojshëm. Gjithashtu edhe mbështetja për Gjykatën e Posaçme si dhe lufta ndaj krimit të organizuar”, ka deklaruar Thaçi.
Ai më tej ka pohuar se pret të takohet me partitë politike në fillim të javës duke u bërë thirrje atyre që, siç tha, të gjejnë formulën që Kosovës i jep një qeveri të qëndrueshme, funksionale dhe efektive dhe që merr vendime që e çojnë vendin përpara dhe jo që e izolon vendin.
Thaçi, duke ju kundërpërgjigjur akuzave se po e ndihmon PAN-in, ka mohuar të bën favore për ndonjë parti, koalicion apo individ.
“Unë nuk e kam përcaktuar afatin kushtetues dhe ligjor. Ai është i përcaktuar me kushtetutë dhe ligj, të gjithë deputetët kanë votuar më herët në parlamentin e Kosovës kështu që unë para se gjithash bazë për angazhim dhe veprim timin e kam afatin kushtetues dhe ligjor, nuk është ky vullneti im, është e drejta kushtetuese”.
Ndërkaq i pyetur se a ka ndonjë afat për përfundimin e bisedimeve për normalizimin e marrëdhënieve me Serbinë, Thaçi ka treguar vetëm kur do rifillojnë ato.
“Ajo çfarë kemi diskutuar herën e fundit në Bruksel ka qenë ajo që duhet mendojmë për idetë e para fillestare dhe të parakohshme në mënyrë që të jemi të përgatitur për fillimin e këtij procesi në pjesën e vonshme të verës apo fillimin e hershëm të vjeshtës”, ka deklaruar presidenti kosovar. /tesheshi.com/
