Partia Socialiste po përgatitet për të qeverisur dhe 4 vitet e ardhshme pas një fitore të thellë në zgjedhjet e fundit, rezultati i të cilave i dha asaj të drejtën për te qeverisur e vetme pa aleatë.
Por pavarësisht këtij rezultati zgjedhor, socialistët po mundohen të rrinë me këmbë në tokë dhe të menaxhojnë fitoren si përgjegjësi, jo si entuziasëm.
Në këtë frymë do të jetë dhe mbledhja e Asamblesë së partisë që është njoftuar të mbahet të dielën e 27 gushtit në Hotel Tirana.
Kjo mbledhje do të marrë në shqyrtim analizën e zgjedhjeve, raportet e grupeve të punës të ngritura fill pas zgjedhjeve për të parë performancën e deputetëve socialistë në të gjitha qarqet. Po ashtu nga kjo mbledhje e forumit të lartë drejtues të kësja partie pritet të vijëzohet përbërja e qeverisë së re socialiste.
Qeveria e re, rinovimi i administratës, programi i ri qeverisës që do të dalë pas dëgjesave me qytetarët dhe vijimi i marrëveshjes së 18 majit me PD-në pritet të ëjenë çështjet që socialistët do të diskutojnë në këtë forum, e njohur si KPD-ja e famshme në kohëne Fatos Nanos.
Diskutimet do të bëhen në bazë të 5 raporteve që do të paraqiten nga të deleguarit e Ramës si kryetarë të grupeve të punës: Gramoz Ruçi, Milva Ekonomi, Niko Peleshi, Arben Ahmetaj dhe Fatmir Xhafaj.
Burime nga selia rozë bëjnë të ditur se mbi bazën e këtyre raporteve do të ketë vendime të rëndësishme lidhur me strukturimin e qeverisë së re, ministrive dhe fushave të tyre të përgjegjësisë./tesheshi.com/
