Qeveria e Malit të Zi, shmang sërish vendbanimet shqiptare në planin e investimeve në bregdetin Adriatik në kuadër të “Autostradës së Kaltër”.
Drafti i planit për rregullimin e bregdetit të Malit të Zi, nuk parasheh që në Komunën e Ulqinit dhe Tivarit të ketë rrugë lidhëse me Shqipërinë.
Pikërisht ky anashkalim ka sjellë reagimin e shqiptarëve. Deputeti i “Forca”, Genci Nimanbegu kundërshtoi draftin e investimeve, sidomos në lidhje me planifikimin e ndërtimeve në Kripore dhe plazhin e Valdanosit, si dhe mosplanifikimin e rrugëve lidhëse me Shqipërinë.
Ai tha se është e papranueshme që të mos planifikohen rrugët e mundshme që do të lidhnin Ulqinin me Velipojën, dhe Krajën me Shkodrën.
Korridori Blu konsiderohet si projekti më i madh që lidh Mesdheun, nga Veriu në Kroaci, vazhdon në Mal të Zi, Shqipëri dhe përfundon duke e lidhur me Greqinë, në krijimin e asaj që cilësohet si “Unaza e Ballkanit”.
Qeveria malazeze ka hartuar planin e fisibilitetit, duke e sjellë rrugën jo nga Ulqini dhe Ana e Malit por nga Podgorica që shkon në Han të Hotit, duke shmangur totalisht bregdetin.
Ndërkohë nga Ulqini shkon direkt në Velipojë e prej andej në Shëngjin.
Sipas planit malazez, autostrada nga Grahova në pikën kufitare të Bozhaj(Han i Hotit) do të formojë segmentin malazez të seksionit Adriatiko Jonian. Rruga e Kaltër do të kalojë nga pika kufitare me Bosnjën duke vazhduar në Gjirin e Kotorrit në Podgoricë, duke përfunduar në Liqenin e Shkodrës.
/tesheshi.com/
