Qeveria e Isa Mustafës nuk duhet të angazhohet vetëm me kërcënimin serb në veri, por dhe me atë të qenve në Prishtinë.
Prania e madhe e qenve endacakë në rrugët e kryeqytetit kosovar vazhdon t’i shqetësojë banorët, të cilët rrezikohen përditë edhe nga kafshimi që mund të bartë sëmundje, pasi këta qenë qëndrojnë afër vendgrumbullimeve të bërllokut.
Këtë shqetësim e ka ngritur edhe kryetari Shpend Ahmeti në takimin e së mërkurës të Këshillit Komunal për Siguri në Bashkësi, ka kërkuar nga qeveria me urgjencë ta trajtojë problemin e qenve endacakë.
Ai ka potencuar se Komuna nuk mund të bëjë shumë rreth kësaj problematike, pasi nuk ka as kapacitete e as mjete për të parandaluar rrezikun nga ta.
Që nga paslufta, komuna e Prishtinës shpesh ka urdhëruar vrasjen e qenve endacak duke rekrutuar “gjuetarë” për të kontrolluar situatën. Vrasjet e fundit janë dokumentuar në vitin 2011 në Prishtinë, kur ishin vrarë 300 qenë endacak.
Bashkimi Evropian thotë se standardi i saj për shtetet anëtare është që të kenë një strategji kolektive të menaxhimit të popullsisë së qenve. Kjo përfshin ligjet kundër dhunës (përfshirë urdhrin për vrasjen e qenve), vaksinimet, sterilizimet, si dhe promovimin e pronësisë së kafshëve shtëpiake.
Në Kosovë, aktualisht, janë dy strehimore për qentë endacak.
Sipas organizatës joqeveritare “Strehimorja për Qen dhe Mace të Kosovës se Jugut” (SQMKJ), në Kosovë janë afër 50,000 deri 70,000 qenë endacak. Disa grupe për mbrojtjen e kafshëve, ndërkohë vlerësojnë numrin e qenve endacak mbi 200,000. /tesheshi.com/
