Shtetet e Bashkuara janë përgjigjur ashpër ndaj kritikave të Londrës për fjalimin e Sekretarit të Shtetit, Xhon Kerri ku ai dënoi Izraelin për vazhdimin e vendbanimeve në territoret e pushtuara palestineze. Duket se fjalimi ka ndezur një konflikt mes dy aleatëve që pretendojnë se kanë “një lidhje të veçantë” mes tyre.
Kështu, kryeministrja britanike Theresa May e distancoi Britaninë e Madhe nga Uashingtoni në dënimin që Kerri i bëri Izraelit, duke bërë disa komente që më vonë u mësuan se synonin të ndërtonin ura me administratën Trump që pritet të marrë detyrën pas 20 janarit.
Sekretari në largim i Shtetit, Xhon Kerri, në fjalimin e tij të fortë këtë javë, kritikoi qeverinë e Benjamin Netanjahut si koalicionin më ekstremisht djathtas në historinë e Izraelit dhe paralajmëroi se zgjerimi i shpejtë i vendbanimeve në territoret e pushtuara do të thotë se “status-kuoja po çon vetëm drejt një shteti dhe pushtimit të përjetshëm”.
Zëdhënësja e kryeministres britanike saktësoi se May mendon se nuk ishte e përshtatshme të bëhen sulme kaq të forta me fjalë ndaj një qeverie apo të vendoset fokusi vetëm në çështjen e vendbanimeve izraelite.
Sipas kryeministres, Britania vazhdon të besojë se ndërtimi i vendbanimeve në territoret e pushtuara palestineze është i paligjshëm, e për këtë edhe mbështeti rezolutën e Këshillit të Sigurimit.
“Por, ne besojmë gjithashtu se vendbanimet nuk janë aspak problemi i vetëm në këtë konflikt. Në veçanti, populli i Izraelit meriton të jetojë i lirë nga kërcënimi i terrorizmit, me të cilin i është dashur të përballet prej një kohe të gjatë”.
Por, Departamenti Amerikan i Shtetit u kundërpërgjigj me deklarata jo diplomatike.
“Jemi të habitur nga deklaratat e kryeministres britanike për komentet e sekretarit Kerri – që mbulonin një spektër të gjerë kërcënimesh ndaj zgjidhjes përmes krijimit të dy shteteve, përfshirë terrorizmin, dhunën, nxitjen dhe vendbanimet”.
Deklarata e DASH shton se SHBA janë mirënjohëse për deklaratat fuqishëm në mbështetje të fjalimit të Kerrit nga e gjithë bota, përfshirë Gjermania, Francën, Kanadanë, Jordaninë, Egjiptin, Turqinë, Arabisë Saudite, Emiratet e Bashkuara Arabe dhe të tjera shtete.
Presidenti Obama që do të dorëzojë detyrën tek Donald Trump më 20 janar ka ndërmarrë disa hapa në ditët e fundit të tij në Shtëpinë e Bardhë për të siguruar një trashëgimi në politikën e jashtme, përfshrië mbështetjen e rezolutës së OKB-së. Administrata Obama shpreson që kjo rezolutë të krijojë terrenin për veprime të ardhshme nga qeveri të tjera. Kerri e ka pasur rinisjen e negociatave mes izraelitëve dhe palestinezëve një qëllim qendror të mandatit të tij si Sekretar Shteti, por ka pasur pak progres.
Trump, i cili ka dhënë komente të vendosura pro-Izraelit gjatë fushatës elektorale, u përgjigj me zemërim ndaj rezolutës duke pretenduar se humbja e Izraelit në këtë mes, është se rezoluta e OKB-së do ta bëjë shumë më të vështirë negociimin e paqes.
Ndërkohë, kryeministria britanike, May dihet se po kërkon të krijojë marrëdhënie të ngushta me Shtëpinë e Bardhë të Donald Trump. Madje, ambasadori britanik në SHBA, Kim Darroch, ka thënë se shpreson të arrihet në marrëdhënien midis Margaret Thatcher dhe homologut të saj amerikan, Ronald Reagan.
Përgatiti: Juli Prifti – /tesheshi.com/
