Shtëpia e Bardhë tha sonte, 27 tetor 2023, se nuk do të ishte e përshtatshme të gjykohej njoftimi i Forcave të Mbrojtjes të Izraelit të premten se ato po zgjerojnë operacionet tokësore.
“Sigurisht, ne kemi parë Izraelin të ndërmarrë operacione të ndryshme në terren në ditët e fundit,” u tha gazetarëve zëdhënësi i Këshillit të Sigurisë Kombëtare John Kirby, sipas CNN. “Por përsëri, ne nuk do ta komentojmë atë që ata po përpiqen të bëjnë në fushë”.
Kirby tha se nuk do të trajtojë atë që Izraeli po bën në terren, si po e bëjnë atë apo “përparimin që po bëjnë”. Ai tha se SHBA do të vazhdojë të ofrojë ndihmë ushtarake për Izraelin.
“Ne do të vazhdojmë të mbështesim dëshirën e tyre për aftësi… dhe municione dhe ky proces vazhdon,” tha Kirby.
Ai tha se presidenti Joe Biden është ende duke punuar për të siguruar që ndihma humanitare të hyjë në Gaza dhe që civilët që duan të largohen mund ta bëjnë këtë. Kirby shtoi se 10 kamionë shtesë me ndihma kishin hyrë në Gaza, duke e çuar totalin në 84 që nga fillimi i konfliktit.
Kujtojmë se ushtria izraelite ka nisur sonte një sulm të paprecedentë në Rripin e Gazës, ku nuk funksionojnë më as interneti dhe as lidhjet e telekomunikacionit. Vetëm reporterët e Al Jazeera-s arrijnë të “përhapen” në botë me një mesazh të vetëm nëpërmjet satelitit. /tesheshi.com/
