Nga Bashkim Kastrati
Në Qendrën Klinike Universitare të Kosovës (QKUK), përkatësisht në Repartin e Anesteziologjisë dhe Reanimacionit, për mjekim post-intensiv zakonisht gjenden disa pacientë të cilët janë në koma vigjile.
Në këto reparte janë gjithsej 12 shtretër, derisa është qendër referente për tërë Kosovën dhe në mungesë të qendrave rehabilituese përkatëse, këta pacientë qëndrojnë në këtë klinikë, edhe pse nuk e kanë vendin aty.
Qëndrimi i këtyre pacientëve aty krijon pengesa në punët e përditshme të reparteve në fjalë pasi që për këta pacientë duhet të sigurohet nga një shtrat me një respirator dhe kjo pamundëson që t’i ndihmohet rasteve tjera që mbesin në emergjencë për disa ditë ose javë.
Në shumë vende, pacientët të cilët bien në koma vigjilje, trajtohen në qendra të posaçme, rehabilituese apo edhe në shtëpi. Në Kosovë këto raste, trajtohen në qendra hospitalizuese. Kështu ndodh meqë familjarët hezitojnë të kujdesen në shtëpi për këtë kategori pacientësh.
Kujtojmë se para vitit 1999 pacientët në koma janë transferuar në qendrat e rehabilitimit në banjën e Kllokotit dhe atë të Pejës, derisa pas këtij viti pacientët në koma, kanë mbetur në Klinikën e Anesteziologjisë dhe Reanimacionit.
Pacientët që janë pa vetëdije, fillimisht dërgohen në Klinikën Emergjente në Qendrën Klinike Universitare të Kosovës ku kjo klinikë i mban 3 deri në 6 orë dhe pasi të është diagnostikimi, shërbimet konsultative radiologjike dhe laboratorike dhe dërgohen në Klinikën e Reanimacionit.
Në lidhje me këtë çështje tesheshi.com ka kontaktuar edhe Qendrën Klinike Universitare të Kosovës (QKUK), por edhe pas pritjes për më shumë se një javë, zyra për informim e QKUK-së nuk ka kthyer përgjigje për këtë çështje.
Ministria e Shëndetësisë: Pacientët që janë në koma të dërgohen në spitalet rajonale
Në Ministrinë e Shëndetësisë thonë se deri në ndërtimin e një klinike të re për mjekimin intensiv, e cila parashihet që brenda dy vjetësh të hyjë në funksion, nuk do të ketë ndonjë ndryshim.
Faik Hoti, drejtor i departamentit për informim në Ministrinë e Shëndetësisë (MSh), ka thënë për tesheshi.com se sa u përket pacientëve në koma vigjilje, MSh e ka rekomanduar QKUK-në që pacientët që ka mundësi, të bartën në spitalet e përgjithshme të rajoneve prej nga vijnë ata, me qëllim që puna të lehtësohet për stafin në QKUK.
Ai thotë se qëndrimi i gjatë i disa pacientëve në koma në Klinikën e Anesteziologjisë paraqet vështirësi në punën aty, për shkak të hapësirës së ngushtë që kanë. Hoti thotë se tash, QKUK është pjesë e SHSKUK-së (Shërbimit Spitalor Klinik Universitar i Kosovës)dhe i takon menaxhmentit të kësaj qendre që ta vlerësojë cila është zgjidhja më e mirë për pacientët.
“Siç keni mundur të njoftoni nga komunikatat zyrtare të MSH-së, ditë më parë midis MSh-së dhe organizatës qeveritare turke TIKA është nënshkruar Marrëveshja e bashkëpunimit, përmes të cilës TIKA do ta bëjë kujdesin e ri Intensiv në QKUK me afër 30 shtretër dhe në vlera prej rreth dy milionë eurove. Punimet, pas përfundimit të procedurave të prokurimit në shtetin turk, meqë është investim komplet i tyre pritët të nisin sivjet. Me ketë projekt, Anesteziologjisë dhe Reanimacionit, do të mund t’i krijohen mundësi më të mira në aspektin e infrastrukturës, përfshirë edhe hapësirën”, thotë Hoti.
Sa u përket projekteve si qendra rehabilituese, Hoti thotë se ato mund t’i propozojnë njësitë kërkuese-ekspertët e klinikave që i hyn në shërbim një qendër e tillë, ndërsa pastaj i mbetët SHSKUK-së dhe MSH-së që të shohin koston financiare, përparësitë që krijon një projekt i tillë, mundësitë buxhetore, eventualisht edhe kontributin e donatorëve.
“Pa projekt, që i përmban këto detaje dhe shumë të tjera specifike, një gjë e tillë nuk mund të bëhet”, theksoi Hoti. /tesheshi.com/
