Autobusi i skuadrës gjermane Herta Berlin është qëlluar me armë zjarri nga një person i cili po ngiste një motoçikletë dhe për fatin e mirë askush nuk u lëndua. Ngjarja ndodhi në fundjavën që lëmë pas deri sa kryeqytetasit udhëtuan për t`u përballur me Arminia Bielefeld në kuadër të raundit të parë të Kupës së Gjermanisë.
Skuadra kishte udhëtuar me tren deri në stacion, por më pas aty do pritej nga autobusi që do t`i shoqëronte futbollistët deri në stadium. Për befasi ata gjetën autobusin e qëlluar nga një person i paidentifikuar që po ngiste një motoçikletë. Fat i mirë, pasi askush nuk u lëndua, mirëpo klubi nga Berlini ka reaguar menjëherë.
“E pabesueshme! Autobusi i skuadrës sonë u qëllua me armë zjarri gjatë ndeshjes që kishim për të zhvilluar në Kupën e Gjermanisë. Për fat askush nuk u lëndua”, thuhet në një postim zyrtar nga klubi i Hertas.
Policia vazhdon të kërkojë atentatorin, deri më tani nuk ka asnjë të dyshuar. /tesheshi.com/
