Nga Blendi Gashi
Nisur nga ligjësia (cinike) e pashkruar e gazetarisë sipas së cilës “Lajm i mirë është lajmi i keq”, janë shtuar format e raportimit që kanë dhe pak makabritet brenda, pa pyetur për sensitetet e publikut.
Fjala vjen, është bërë “trend” publikimi i fotove, videove dhe porositë lamtumirëse të personave të ndjerë, atyre që vetëvriten.
Sociologë dhe ish-gazetarë thonë se mediat duhet të analizojnë mirë para se ta plasojnë një lajm tragjik.
Sociologu Ferdi Kamberi, thotë për tesheshi.com se nuk janë të rralla rastet kur mediat tona, si ato të shkruara dhe ato elektronike, pasqyrojnë këtë fenomen shpeshherë edhe në ato kënde ku mund të bie në sy, gjë që mund të ketë pasoja të shumta sidomos për raste të tjera.
“Mediat në përgjithësi, duhet të respektojnë kodin etik dhe të analizojnë më mirë (sidomos kryeredaktorët e tyre) se çfarë po plasojnë para publikut. Kjo për faktin se gjërat janë të ndjeshme dhe shpeshherë familjarët mund të jenë ata që më shumti e përjetojnë dhimbshëm këtë fakt. Në mediat tona, shpeshherë jepen detaje të vetëvrasjeve, gjë që kjo pastaj ndikon edhe tek familja e personave të vetëvrarë. Do të ishte mirë që mediat në të ardhmen të analizojnë situatat në terren më mirë, të mos jenë pa vëmendshme në raportime të tilla, sepse gjërat mund të marrin trajtë tjetër sidomos në raste të reja. Pra, thënë më gjerësisht mediat në përgjithësi duhet të raportojnë për këto ngjarje, por gjithnjë duke iu ikur titujve bombastikë, titujve që bien në sy, si dhe të mos raportojnë/shkruajnë për detaje tjera, që shpesh po ndodhë në realitet që ende pa e dhënë policia versionin zyrtar mediat po raportojnë”, ka deklaruar sociologu Kamberi.
Sociologia Linda Gusia, thotë se në përgjithësi lajmet në botë kanë të bëjnë me ngjarje dramatike e tragjike. Ajo thotë se mediat nuk është mirë që në edicionet qendrore të publikojnë në detaje lajmet tragjike, por të trajtojnë tema përmes profesionistëve se pse po rritet numri i vetëvrasjeve.
“Mbetet shumë për të dëshiruar në aspketin e etikës gazetareske dhe një lloj humanzimi në përgjithësi. Duhet të ketë edhe ndjeshmëri edhe ndaj anëtarëve të familjes. Nuk kam asgjë kundër raportimit, por duhet të kemi parasysh se detajet e hollësishme nuk janë mirë të shpalosen, ajo po bëhet morbide sepse nuk është për hir të lajmit”, ka deklaruar sociologia Gusia, për tesheshi.com.
Xhevdet Pozhari, ishgazetar i cili për disa vite ka punuar në mediat e Kosovës në një prononcim për portalin tesheshi.com ka shprehur vërejtjet e tij me mënyrën se si po raportojnë në detaje mediat për këtë fenomen.
“E dhimbshme që lajmet për vetëvrasjet zënë hapësirë gjithnjë e më shumë në mediat tona. Madje, përshkruhet deri në detajet më të vogëla rasti. A nuk i shkon mendja ndonjë mediumi se me raportime të tilla mund të nxisin, qoftë edhe paqëllimshëm, raste të reja tek ata persona që janë në prag të një vendimi të tillë. Pas rrezikut dhe pasojave të pavërjetshme që bartin këto lloj raportime, po ashtu ia rëndojnë edhe familjarëve të ndjerit tragjedinë”, është shprehur Pozhari. /tesheshi.com/
