Suedia, e sapoanëtarësuar në NATO, tradicionalisht neutrale, ka ndërtuar një kompleks të fuqishëm ushtarako-industrial, diçka që do të forcojë Aleancën ndërsa përballet me presidentin rus Vladimir Putin.
Suedia hyn në NATO dhe nuk vjen duarbosh. Anëtarësimi i Suedisë është një nxitje e madhe gjeopolitike për NATO-n. Tani anëtarët e Aleancës rrethojnë Detin Baltik, me përjashtim të hyrjes së ngushtë në St. Petersburg në Gjirin e Finlandës dhe eksklaves ruse të Kaliningradit. Përveçse vështirëson jetën e flotës ruse të Detit Baltik, zhvillimi më i ri me Suedinë në NATO i lejon Aleancës të monitorojë tubacionet dhe kabllot kritike nën sipërfaqe.
Suedia është gjithashtu një fuqi e spikatur ushtarake pavarësisht nga madhësia e saj relativisht e vogël. Edhe pse ka një popullsi prej vetëm 10 milionë banorësh dhe shpenzoi vetëm 1.54 për qind të PBB-së së saj për mbrojtje vitin e kaluar, neutraliteti shekullor i vendit ka nxitur zhvillimin e një kompleksi ushtarako-industrial të klasit botëror.
Suedia prodhon një gamë të gjerë pajisjesh ushtarake, nga luftëtarët supersonikë me një motor Saab JAS 39 Gripen deri te pushkët pa zmbrapsje Carl Gustav, armët antitank AT4, nëndetëset e klasit Gotland dhe raketat kundër anijeve RBS15. Përveç kësaj, ajo bashkëpunon me prodhues të tjerë ushtarakë, shembull i të cilave është prodhimi i versionit suedez të tankut gjerman Leopard 2, i njohur si Stridsvagn 122, shkruan Politico.
Sipas Institutit Ndërkombëtar për Studime Strategjike (IISS), buxheti i mbrojtjes i Suedisë për vitin 2023 ishte 9.2 miliardë dollarë, që është 1.54 për qind e PBB-së. Në vitin 2014, anëtarët e NATO-s ranë dakord të ndajnë të paktën dy për qind të PBB-së për mbrojtjen, por jo të gjitha vendet e respektojnë këtë qëllim në mënyrë të barabartë.
Vitin e kaluar, në prag të anëtarësimit në NATO, Suedia njoftoi investime shtesë në mbrojtjen ushtarake. Qeveria beson se këto kosto shtesë, së bashku me zërat e tjerë buxhetorë të përcaktuar nga NATO si shpenzime të mbrojtjes, do të sigurojnë që Suedia të përmbushë objektivin prej dy për qind në 2024.
Suedia ka 14,850 personel ushtarak aktiv, si dhe 21,500 anëtarë vullnetarë të organizatave ndihmëse. Suedia ka gjithashtu një numër të caktuar të personelit ushtarak rezervë, të cilët janë vendimtarë në rast të situatave emergjente dhe nevojës për mobilizim të shpejtë. Sipas IISS, Suedia ka 11,450 ushtarë rezervë. Për shkak të madhësisë së saj relativisht të vogël, Suedia nuk kontribuon shumë në NATO për sa i përket fuqisë punëtore, megjithatë, ushtria suedeze është e pajisur mirë, ka më shumë se njëqind avionë luftarakë të avancuar dhe një marinë moderne, si dhe një industri të avancuar teknologjikisht të mbrojtjes.
Sa i përket pajisjeve, Suedia fokusohet në mbrojtjen territoriale, ndaj investon në artileri, mjete të blinduara dhe modernizimin e tankeve. Sipas Institutit Ndërkombëtar për Studime Strategjike, Suedia ka 1017 transportues të blinduar të personelit, 266 artileri, 110 tanke kryesore luftarake, 99 avionë të aftë për luftim dhe katër nëndetëse me fuqi konvencionale.
Gjithashtu, ajo ka potencial të konsiderueshëm për eksportin e pajisjeve ushtarake falë fokusit të saj në eksporte dhe industrisë së zhvilluar të mbrojtjes. Me anëtarësimin në NATO, Suedia do të ketë akses në diskutime të rëndësishme, tenderë dhe shkëmbim informacioni, veçanërisht në lidhje me teknologjinë shumë të ndjeshme. /tesheshi.com/
