Së pari letra e Erdoganit, e cila vinte pas disa mesazheve pozitive të dërguara drejtpërdrejt apo tërthorazi, e sot vizita e tij në Rusi, në Shën Petërsburg, në vendlindjen e Putinit, i japin fund një kohe të akullt midis dy vendeve, i japin fund një krize të thellë, të provokuar nga rrëzimi i një avioni luftarak rus nga forcat turke nëntorin e shkuar.
Erdogani dhe Putini deklaruan në konferencën e shtypit pas takimit të tyre se Turqia dhe Rusia kanë arritur një njëzëshmëri të qartë për normalizimin e marrëdhënieve.
Në të parin takim mes dy kryetarëve të shteteve që prej atij incidenti fatal, Erdogani e ka falënderuar homologun rus për qëndrimin ndaj puçit ushtarak, duke qenë gjithashtu një nga udhëheqësit e parë që do t’i telefononte.
“Rusia është kundër të gjitha llojeve të përpjekjeve për grusht shteti,” do të deklaronte Putin. “Vizita juaj sot, pavarësisht një situate shumë të vështirë lidhur me politikën e brendshme, tregon se ne të tërë duam të rinisim dialogun dhe të rivendosim marrëdhëniet midis Rusisë dhe Turqisë,” ka vazhduar shefi i Kremlinit.
Në takimin mes dy udhëheqësve i është kushtuar një vëmendje e veçantë marrëdhënieve ekonomike, përtëritjes së shpejtë të tyre, posaçërisht në fushën e turizmit, të energjisë, etj.
Erdogani do të deklaronte se vendi i tij po hynte në një periudhë shumë të ndryshme në marrëdhëniet me Rusinë, e se solidariteti mes dy vendeve do të ndihmonte në zgjidhjen e problemeve rajonale.
Mikpritësi rus dhe mysafiri turk gjetën gjuhën e përbashkët dhe për formimin e një platforme të re, me pjesëmarrjen e Turqisë, Rusisë dhe Azerbajxhanit, për të diskutuar problemet rajonale.
Vizita e Erdoganit në Rusi ka qenë ngjarja e ditës në nivel global. Mediat botërore i kanë kushtuar një vëmendje të posaçme vizitës, me një mbulim të plotë të saj. /tesheshi.com/
