Trupat kozake pro-Kremlinit do të “garantojnë sigurinë publike”, ndërkohë që anëtarë të kësaj organizate sulmuan protestuesit gjatë marshimeve të fundit kundër Putinit në Moskë.
Trupat luftarake kozake pro-Kremlinit – si ata që përdorën rripa lëkure për të sulmuar protestuesit në një marshim të opozitës në Moskë, gjatë fundjavës – do të patrullojnë rrugët e kryeqytetit rus gjatë Kupës së Botës. Raportimet flasin se luftëtarët me kapelet tradicionale kozake prej pellushi, bashkuan forcat me policinë dhe forcën e sigurisë së Rojes Kombëtare për të shtypur protestat e së shtunës në prag të inagurimit të Vladimir Putin, për mandatin e katërt presidencial.
Më shumë se 700 persona, përfshirë edhe liderin e opozitës, Aleksej Navalni, u ndaluan. Navalni u lirua të dielën, por përballet me 30 ditë burg për akuzat e organizimit të një tubimi të paligjshëm. Ai është urdhëruar të paraqitet para gjykatës më 11 maj. Protestues u mblodhën po ashtu në disa qytete në të gjithë Rusinë në demonstratat më të mëdha anti-Putin për pothuajse një vit.
“Ne do të ndreqim gjithkënd që i shkakton telashe Putin”, raportohet të ketë thënë një kozak i paidentifikuar për një faqe lajmesh në internet. Kozakët po ashtu përdorën shkopinj për të goditur protestuesit e mbledhur në sheshin Pushkin në Moskë.
Disa prej këtyre agresorëve u identifikuan si anëtarë të Trupave Qendrore Kozake, një organizatë që ka lidhje të ngushta me forcat e sigurimit të Rusisë. Administrata e Moskës ka paguar organizatën pothuajse 190 mijë paundë për të trajnuar kozakët sesi të “garantojnë sigurinë publike” në ngjarje të ndryshme në qytet, kjo sipas dokumenteve të publikuara nga zyra e kryebashkiakut.
Anëtarët e organizatës kozake së fundmi u takuan me zyrtarët e Rojes Kombëtare për të diskutuar operacionet e sigurisë për Kupën e Botës, që nis më 14 qershor. Media ruse e ka identifikuar atamanin e kozakëve apo liderin e tyre si Ivan Mironov, një ish oficer i shërbimit sekret shtetëror.
Më shumë se 300 kozakë po ashtu do të punojnë përkrah policisë në Rostov-mbi-Don, qytetin jugor rus që do të presë ndeshjet në grup të Kupës së Botës dhe një raund të gjashtëmbëdhjetësheve.
Maxim Shevchenko, anëtar i Këshillit për të Drejtat e Njeriut në Kremlin kërkoi seancë urgjente të këshillit për të diskutuar përdorimin nga autoritetet të luftëtarëve kozakë “fashistë” për të shtypur protestat e së shtunës në Moskë.
Denis Krivosheev, zëvendës-drejtor i Amnesty International për Europën Lindore dhe Azinë Qendrore, akuzoi policinë ruse se po dështon të veprojë ndërkohë që “njerëz me uniforma kozake” rrahin protestuesit.
Kremlini gjatë viteve të fundit ka inkurajuar rigjallërimin e kozakëve, pasardhës të kalorësve të ashpër të periudhës cariste, që dikur ruanin kufijtë jugorë të Rusisë.
Kozakët kanë vepruar si forcë policore ndihmëse në disa qytete, duke ndërmarrë patrullime në rrugë dhe duke kontrolluar për emigrantë të paligjshëm. Ata po ashtu kanë marrë pjesë në kontrollet mbi galeritë e artit dhe teatrot që konsiderohen se përhapin materiale” blasfemuese”. Grupet para-ushtarake kozake kanë luftuar në krah të separatistëve të drejtuar nga rusët në Ukrainën Lindore.
Ata po ashtu, kanë shënjestruar kritikët e Kremlinit. Në vitin 2016, një grup kozakësh sulmuan Navalnin dhe mbështetësit e tij në Anapa, qytet në jug të Rusisë. Anëtaret e Pussy Riot, grupit performues anti-Kremlin, u izoluan nga kozakët në prag të Lojërave Olimpike dimërore të vitit 2014 në Sochi. Asnjë akuzë nuk u ngrit ndaj agresorëve në secilin rast.
Qindra anëtarë të lëvizjes rinore të mbështetur nga Kremlini, “Molodaya Gvardiya” po ashtu ndihmuan policinë në arrestimet gjatë tubimeve të së shtunës në Moskë, ndërsa aktivistë të lëvizjes Kombëtare pro-Putin u përfshinë në përleshje me protestuesit.
Përgatiti: Juli Prifti – /tesheshi.com/
