Presidenti rus Vladimir Putin i propozoi homologut të tij turk Rexhep Tajip Erdogan të enjten ndërtimin e një qendre të gazit natyror në Turqi, raporton Anadolu Agency (AA).
Duke folur në kuadër të një takimi rajonal në Kazakistan, Putin tha se ndërtimi i një qendre në Turqi do të mundësojë, ndër të tjera, rregullimin e çmimeve, shitjen e gazit me çmimet e tregut dhe përjashton “politizimin” e çështjes.
Në takimin me Erdoganin, Putin e quajti Turqinë “partnerin më të besueshëm” për furnizimin me gaz në Evropë.
Presidenti rus tha gjithashtu se ndërtimi i termocentralit bërthamor Akkuyu në Mersin, në jug të Turqisë, po vazhdon sipas planit dhe mund të fillojë punën vitin e ardhshëm, në 100-vjetorin e themelimit të shtetit modern turk.
“Rusia vazhdon dërgesat e gazit përmes gazsjellësit Rrjedha Turke, pavarësisht përpjekjeve për ta dëmtuar atë”, shtoi Putin.
Me rastin e marrëveshjes së Stambollit për burimin e drithit nga Ukraina, e cila u ndërmjetësua nga Turqia dhe Kombet e Bashkuara, presidenti rus u ankua se ende vetëm një pjesë e vogël e dërgesave shkon në vendet më të varfra.
“Vendet që morën grurin ukrainas si pjesë e Marrëveshjes së Stambollit duhet t’i jenë mirënjohës Erdoganit,” tha Putin. /tesheshi.com/
