Topi i përdorur nga Diego Armando Maradona për të shënuar golin e njohur tani si “Dora e Zotit” dhe goli i dytë i quajtur “Goli i Shekullit”, të cilin Argjentina mundi Anglinë në çerekfinale të Kupës së Botës 1986 në Meksikë, do të dalë në ankand muajin e ardhshëm në Britaninë e Madhe, transmeton dpa.
Vlerësohet se topi mund të arrijë një çmim midis 2.9 dhe 3.4 milionë euro dhe më 16 nëntor, shitja do të bëhet nga shtëpia britanike e ankandeve Graham Budd.
Topi është në pronësi të tunizianit Ali Bin Nasser, i cili ishte gjyqtari kryesor në ndeshjen e lartpërmendur të luajtur në stadiumin Azteca në Mexico City.
Goli kryesor u shënua nga Maradona duke përdorur dorën e tij për të ridrejtuar topin mbi portierin anglez Peter Shilton, por as arbitri kryesor dhe as ndihmës arbitri nuk e panë atë, kështu që goli u njoh.
“Nuk mund ta shikoja mirë situatën. Të dy lojtarët, Shilton dhe Maradona, më kishin kthyer kurrizin. Sipas udhëzimeve të FIFA-s të lëshuara përpara turneut, shikova drejt ndihmës arbitrit për të konfirmuar se goli ishte i ligjshëm. Ai po lëvizte drejt mesit të fushës, gjë që e bëri të qartë se gjithçka ishte në rregull dhe se goli duhej pranuar”, tha Ali Bin Nasser.
Ai tregoi gjithashtu sesi trajneri i atëhershëm i Anglisë Bobby Robson iu afrua pas ndeshjes dhe i tha: “Bëre një punë të mirë, por asistenti ishte i papërgjegjshëm”.
Në deklaratën e tij pas ndeshjes, Maradona ka komentuar të njëjtën situatë duke thënë se goli është shënuar “pjesërisht me kokën e Maradonës dhe pak me dorën e Zotit”.
Më vonë, argjentinasi i famshëm shënoi një gol në të cilin kaloi pesë përfaqësuesit anglezë në një sllallom nga mesi i fushës, anashkaloi portierin Shilton dhe dërgoi topin në rrjetë.
Maradona vdiq dy vjet më parë, dhe arbitri tunizian tha se tani është koha e duhur për të ndarë memorabilet e vlefshme me botën dhe shprehu shpresën që blerësi ta shfaq topin në një hapësirë publike.
Fanella tashmë është shitur për një shumë rekord
Shtëpia e ankandeve Graham Budd tha: “Duke pasur parasysh kontekstin historik, ne presim që ky top të jetë shumë i kërkuar kur bëhet fjalë për ankand.”
Fanella e Maradonës, të cilën ai e veshi në fitoren çerekfinale ndaj Anglisë, u shit në maj për 9.5 milionë euro, që është një shumë rekord për një veshje sportive.
Në Kupën e Botës në Meksikë në vitin 1986, Argjentina fitoi kampionatin duke mposhtur Gjermaninë Perëndimore në finale me rezultatin 3:2.
Së bashku me topin, në ankand do të përfshihet edhe bluza e gjyqtarit Ali Bin Nasser, të cilën e kishte veshur në ndeshjen mes Argjentinës dhe Anglisë, si dhe fanellën me firmën e Maradonës, të cilën më vonë e mori si dhuratë nga legjenda e futbollit argjentinas. /tesheshi.com/
