Presidenti rus ka bërë të ditur, sipas një interviste të zbardhur, se ai është i përgatitur ta takojë në çdo çast shefin e ri të Shtëpisë së Bardhë.
“Ne jemi gati në çdo moment. Nuk ka probleme nga pala jonë,” raporton Associated Press të ketë thënë Vladimir Putin.
Megjithatë, Putin e ka pranuar se, për shkak të marrëdhënieve aktuale mes dy vendeve, nuk do të jetë diçka e lehtë.
“Ne e kuptojmë se kjo nuk do të jetë një detyrë e thjeshtë, duke patur parasysh shkallën e degradimit të marrëdhënieve ruso-amerikane. Por ne jemi përgatitur të bëjmë pjesën tonë.”
Kreu i Kremlinit ka nënvizuar dhe gatishmërinë e homologut të ardhshëm amerikan për përmirësimin e marrëdhënieve.
“Eshtë e ditur mirë se presidenti i zgjedhur i Shteteve të Bashkuara ka bërë thirrje publikisht për normalizimin e marrëdhënieve ruso-amerikane. Ne nuk mund të bëjmë gjë tjetër, veçse ta mbështesim këtë.”
Putin ka theksuar gjithsesi se një takim mes tyre ka gjasa të kryhet pasi presidenti i ri amerikan të marrë detyrën në fillim të vitit të ardhshëm. /tesheshi.com/
