Zëdhënësi i NATO-s, Piers Cazalet ka shprehur entuziazmin e Aleancës që prej këtej e tutje do të ketë në Kuçovë bazën e saj në Ballkanin Perëndimor. Ai, në një prononcim për ATSH-në ka përmendur shifrën e 51 milion eurove investim aty.
“NATO ka në plan të investojë 51 milion euro për të modernizuar bazën ajrore të Kuçovës në Shqipëri. Paratë do të shkojnë drejt përmirësimit të infrastrukturës në bazë, përfshirë edhe depot e karburantit”, tha Cazalet.
Zëdhënësi i aleancës ushtarake më të fuqishme në botë, tha se “programi është pjesë e financimit të përbashkët të NATO-s në të cilin kontribuojnë të 29 vendet anëtare”.
“Ne jemi mirënjohës për kontributin e çmuar të Shqipërisë për sigurinë tonë të përbashkët, përfshirë misionet tona në Afganistan dhe Kosovë. Shqipëria gjithashtu i jep një mbështetje të fortë partnerëve tanë, përfshirë kontributin në Fondet tona të Kujdestarisë për Ukrainën, ndihmën në mbrojtjen kibernetike dhe tranzicionin e karrierës ushtarake”, deklaroi Cazalet. Që pas anëtarësimit në NATO, ky është zhvillimi më i rëndësishëm për Shqipërinë si pjesëtarë e Aleancës Veriatlantike. /tesheshi.com/
