Ushtria amerikane ka thënë se mund të ngadalësojë tërheqjen e saj nga Afganistani, në dritën e fitoreve të fundit të talibanëve, të cilët pretendojnë se kanë pushtuar zona më të mëdha dhe sekuestruar pajisje ushtarake.
Zëdhënësi i Pentagonit John Kirby tha se afati i 11 shtatorit për përfundimin e tërheqjes mbetet, por se ritmi i tërheqjes mund të ndryshohet, raporton BBC.
“Situata në Afganistan po ndryshon ndërsa talibanët vazhdojnë të kryejnë sulme dhe shkatërrojnë qendrat e zonave, dhe dhuna mbetet e lartë. Nëse ndryshimet në ritmin ose qëllimin dhe shkallën e tërheqjes janë të nevojshme, në çdo ditë ose çdo javë, ne duam të jemi fleksibël në mënyrë që ta bëjmë atë,” theksoi ai.
“Çdo ditë ne monitorojmë situatën në terren, çfarë mundësish kemi, çfarë burimesh shtesë na duhen për të tërhequr nga Afganistani dhe me çfarë ritmi.”
Zyrtarët e Pentagonit thanë javën e kaluar se tërheqja ishte përgjysmë.
Afganistani po përballet me dhunë të shtuar ndërsa SHBA dhe NATO përgatiten të tërheqin forcat e tyre të mbetura.
Gjatë 30 ditëve të kaluara, talibanët kanë shtuar sulmet dhe kanë marrë nën kontroll më shumë se 30 rrethe.
Ata gjithashtu fituan sasi më të mëdha të pajisjeve ushtarake, raporton BBC, duke iu referuar medias lokale dhe vranë, plagosën ose kapën dhjetëra ushtarë.
Por zëdhënësit e qeverisë afgane kanë mohuar që qarqet ranë në duart e talibanëve.
Ata pretendojnë të kenë kontroll mbi të gjithë provincën veriore Kunduz dhe se vetëm kryeqyteti i krahinës është ende në duart e qeverisë. /tesheshi.com/
