Kryeministri hungarez Viktor Orban zbarkoi në Gjeorgji pasi uroi partinë qeverisëse të vendit Ëndrra Gjeorgjiane (GD) për një “fitore bindëse” në zgjedhjet parlamentare, pavarësisht shqetësimeve të përhapura rreth frikësimit dhe presionit të votuesve.
Orban po kryeson një delegacion të ministrave të tij të lartë për të takuar kryeministrin gjeorgjian Irakli Kobahidze në një vizitë dy-ditore që ka të ngjarë të zemërojë liderët e tjerë të BE-së ndërsa Hungaria mban presidencën e rradhës.
Orban “nuk po përfaqëson Bashkimin Evropian” në vizitën e tij, tha të hënën shefi i diplomacisë së BE-së Josep Borrell për radion publike spanjolle. “Presidenti i rradhës nuk ka fuqi në politikën e jashtme”, shtoi ai, siç raportohet nga The Guardian.
Udhëheqësi hungarez mbërriti në Tbilisi ndërsa opozita mbajti një protestë të madhe për të hënën mbrëma mbi rezultatet e zgjedhjeve, të cilat i dhanë një goditje shpresave të anëtarësimit të Gjeorgjisë në BE.
Presidentja pro-evropiane e Gjeorgjisë, Salome Zurabishvili tha se ajo nuk i njeh rezultatet dhe se vendi i saj është bërë viktimë e një “operacioni special rus”.
Zurabishvili tha të hënën se GD fitoi vetëm 40 përqind të votave, gjerësisht në përputhje me dy sondazhet që treguan se opozita fitoi shumicën e vendeve në parlament. Komisioni shtetëror zgjedhor njoftoi të dielën se GD fitoi 54 përqind të votave, një rezultat që siguron se do të vazhdojë të ushtrojë një sundim gjithnjë e më autoritar për katër vjet të tjerë. Një exit poll i porositur nga kanali televiziv Imedi, i cili mbështet Ëndrrën Gjeorgjiane, tregoi se partia në pushtet thuhet se ka mbështetjen e 56 përqind të votuesve.
Orban uroi Kobahidze dhe GD për “fitoren e tyre dërrmuese” të shtunën, përpara se të shpalleshin rezultatet e zgjedhjeve.
Siç raportohet, miliarderi Ivanishvili është themeluesi dhe presidenti i nderit – pra koka hije – e partisë në pushtet Ëndrra Gjeorgjiane, e cila mbron bashkëpunimin me Rusinë. /tesheshi.com/
