Në fund të seancës maratonë të së enjtes, Parlamenti miratoi emrat e deputetëve që do të përbëjnë komisionin hetimor për veprimin dhe mos veprimin e institucioneve rreth çështjes së drogës, përfshirë edhe rastin e ish-ministrit të Brendshëm, Saimir Tahiri.
Objekti i punës së komisionit do të jetë verifikimi i pasojave të vendimit të parlamentit për të mos lejuar arrestimin e ish-ministrit të Brendshëm të akuzuar për përfshirjen në trafikun e drogës.
Një tjetër pikë hetimi do të jetë dhe verifikimi i rolit të ministrisë së Drejtësisë në ekstradimin në Itali të Nazer Seitit, i akuzuar dhe si financier i grupit “Habilaj” të arrestuar në Itali.
Opozita ka deklaruar se me këto veprime, si Kuvendi ashtu edhe Ministria kanë ndikuar në procesin hetimor.
Nga Partia Socialiste, anëtarët do të jenë: Ermonela Felaj, Klotilda Ferhati, Pjerin Ndreu, Paulin Stërkaj, Xhemal Qefalia dhe Bashkim Fino.
Nga opozita, PD ka 4 anëtarë: Enkelejd Alibeaj, Myslim Murrizi, Flamur Noka dhe Edi Paloka, ndërsa një është i LSI, Endrit Brahimllari.
Sipas rregullores, opozita ka kryetarin e komisionit, ndërsa Partia Socialiste ka shumicën në komision. Ndërkohë, shumica ka rrëzuar me 72 vota amendamentet e propozuara nga opozita për Kryeprokuroren.
PD dhe LSI kërkuan që kryeprokurorja e Përkohshme, Arta Marku, të shkarkohet dhe të nisë procedura e zgjedhjes së një prokurori të përgjithshëm të përkohshëm sipas këtyre amendamenteve, të kishte kaluar Vettingun dhe të zgjidhej me 3/5 e votave. /tesheshi.com/
