Nga Blendi Gashi
Që nga viti 2013, Kuvendi i Kosovës nuk ka mundur të kryejë auditimin e financave të subjekteve politike, duke shkelur kështu ligjin për financimin e tyre, specifikisht nenin 19.1 dhe 19.2 për kontroll financiar. Ky mospublikim, përveç Vetëvendosje-s, vë në pikëpyetje transparencën e këtyre partive në lidhje me fondet.
Zyra e BE-së kërkon auditimin e partive politike
Mungesa e transparencës financiare është theksuar së fundi edhe në Raportin e Komisionit Evropian për Kosovën, si dhe në takimin që shefja e zyrës së BE-së, Nataliya Apostolova e zhvilloi së fundmi me kryeparlementarin Kadri Veseli dhe shefat e komisioneve të diskutuar agjendën për reforma evropiane dhe auditimin e partive politike.
Ky u fundit premtoi që partia e tij të publikojë raportet financiare që nga viti 2012 dhe u shpreh se si kryetar i Kuvendit ai do t’i inkurajojë edhe partitë e tjera ta bëjnë të njëjtën gjë. (Por, shtrohet pyetja pse partia e tij që nga 2013-ta nuk publikoi raportet financiare?!)
“Pranojnë para nga biznese kriminale, prandaj kanë frikë të auditohen”
Ndërsa kryekuvenadri Veseli shprehu përkushtimin e tij me zyrtaren e BE-së për auditimin e partive, analistët politikë bëjnë fajtor pikërisht krerët e shtetit e në veçanti Veselin vetë si kryetar Kuvendi për neglizhencë për zgjedhjet e audituesve, që është dhe arsyeja se pse nuk është kryer auditimi.
Por njohësi i rrethanave politike në vend, Faik Krasniqi i sheh gjetiu arsyet.
“Pranojnë para nga biznese kriminale, biznese që janë edhe të tyre, të cilat pas ardhjes në pushtet i shpërblejnë me tendera milionëshe. Prandaj kanë frikë që të auditohen”.
Veseli fajtor…
Edhe sipas analistit politik Arsim Haziri, arsyeja e mosauditimit duhet parë si e qëllimshme, dhe për këtë përgjegjësia bie mbi Kadri Veselin.
“Kjo klimë konsideroj se iu shkon përshtati subjekteve më të shtrira në vend, pasi duke vazhduar nën këtë situatë arrijnë të fshehin gjithë ato shpenzime marramendëse. Për tu besuar se kjo çështje iu kunvenon disa subjekteve, është edhe neglizhenca e kryekuvendarit i cili kësaj çështje nuk ia ka arrit t’i krijojë hap përmes një konkursi publik ku do të mund edhe të përzgjedheshin 10 auditues. Kjo është vazhdë e qëllimshme e pushtetit,pasi ato kanë edhe kompetencat për të përfunduar këtë çështje”, thotë Haziri.
Një ditë më parë, koalicioni i organizatave jo-qeveritare, në kuadër të “Javës kundër korrupsionit”, organizoi një tryezën me temë: “Integriteti dhe financimi i partive politike”.
Stephen Banks, nga ambasada amerikane në Prishtinë tha se çështja e financimit të partive politike është një çështje dhe problematikë edhe e Amerikës por edhe e vendeve të tjera. Ndërsa Faton Topalli, deputet i Vetëvendosje-s, njëherit sekretar i Komisionit Kuvendar për mbikëqyrje të financave poltike foli për shfrytëzimit e mjeteve të buxhetit për fushatat elektorale, ku theksoi se partitë politike financohen me rreth 4.2 milionë nga buxheti dhe se ato po ashtu kanë marrë 260 milionë euro nga tenderët e buxhetit të shtetit. /tesheshi.com/
