Vendet e NATO-s do ta furnizojnë Ukrainën me armë të rënda moderne, por kjo “kërkon kohë” sepse kërkon trajnim të ushtrisë ukrainase në përdorimin e tyre, tha sot Sekretari i Përgjithshëm i NATO-s, Jens Stoltenberg.
“Ne kemi marrë masën urgjente, por kërkon kohë,” shpjegoi ai në një konferencë shtypi përpara fillimit të një takimi të ministrave të mbrojtjes të NATO-s.
“Tranzicioni nga pajisjet ushtarake të epokës sovjetike në pajisjet moderne të NATO-s kërkon që ukrainasit të jenë gati për t’i përdorur ato,” tha ai. “Ky është një tranzicion i vështirë dhe kërkues.”
Aleatët e NATO-s deri më tani e kanë furnizuar Ukrainën me armë të rënda të epokës sovjetike nga rezervat e tyre, sepse ukrainasit janë trajnuar për t’i përdorur ato. Kërkesat e Kievit tani kanë të bëjnë me sistemet e armëve në dispozicion të forcave aleate.
“Këto janë sisteme me rreze të gjatë, sisteme kundërajrore me standarde të NATO-s, të cilat kërkojnë trajnime, mirëmbajtje”, tha Stoltenberg, i cili mori pjesë dje në një takim në Hagë me krerët e shtatë vendeve të Aleancës.
Ministri ukrainas i Mbrojtjes Oleksiy Reznikov do të marrë pjesë në takimin ministror të NATO-s që do t’i paraprijë një takim i “grupit të kontaktit” të ngritur nga SHBA.
“Ministri Reznikov do të informojë për nevojat urgjente, llojin e pajisjeve dhe misionin e tyre në mënyrë që sistemet e armëve të luajnë një rol vendimtar në fushën e betejës,” tha ai.
Ukraina po kërkon, ndër të tjera, 300 sisteme raketash me shumë lëshime, 2000 automjete të blinduara dhe 1000 dronë, njoftoi Mikhail Pontolyak, një këshilltar i Presidentit Zelensky në llogarinë e tij në Twitter përpara samitit të NATO-s. /tesheshi.com/
