Gjigandi dixhital amerikan Meta po vonon lëshimin e softuerit të ri të inteligjencës artificiale (AI) në Evropë për shkak të shqetësimeve nga agjencitë e mbrojtjes së të dhënave.
Autoriteti irlandez i mbrojtjes së të dhënave në krye të Meta-s në Bashkimin Evropian i ka kërkuar kompanisë që për momentin të mos trajnojë modelet e saj të inteligjencës artificiale bazuar në postimet e disponueshme publikisht në rrjetet sociale Facebook dhe Instagram, shkruan agjencia gjermane dpa.
Pa trajnime me përmbajtje lokale, Meta nuk mund t’u ofrojë përdoruesve në Evropë përvojën më të mirë, tha kompania në një postim në blog. Në të njëjtën kohë, Meta shprehet i bindur se qasja e tij është në përputhje me ligjet dhe rregulloret evropiane.
Meta nuk është i vetëm në trajnimin e inteligjencës artificiale, “dhe ne jemi më transparent se shumë të tjerë në industrinë tonë”, njoftoi kompania.
Vendimi për të vonuar erdhi pas kritikave se Meta u dha vetëm mundësinë njerëzve të kundërshtonin përdorimin e të dhënave të tyre, por nuk u kërkoi atyre pëlqimin e qartë.
Ankesa në 11 vende
Aktivistët e mbrojtjes së të dhënave nga organizata NOYB më pas paraqitën ankesa në 11 vende javën e kaluar dhe kritikuan Meta-n për procedurën e saj “të fshehur dhe mashtruese”.
Meta fillimisht pretendoi se kishte një “interes legjitim” për trajnimin e modeleve të inteligjencës artificiale dhe se vetëm përmbajtjet e disponueshme publikisht nga përdoruesit e rritur duhet të përdoren për këtë qëllim.
Autoriteti i mbrojtjes së të dhënave të Irlandës përshëndeti të premten vendimin e Metës për të vonuar planet e saj në Evropë.
Kompania përdor softuerin e saj të inteligjencës artificiale, Meta AI, për të konkurruar kundër programeve të tjera si ChatGPT.
Meta AI është krijuar për të gjeneruar tekst dhe imazhe dhe për t’iu përgjigjur pyetjeve të përdoruesve. Muajt e fundit Meta ka theksuar vazhdimisht se inteligjenca artificiale do të ndryshojë ndjeshëm platformat sociale.
Në të njëjtën kohë, Meta tha se synon të vazhdojë të sjellë funksionalitetin e inteligjencës artificiale në Evropë. /tesheshi.com/
