Samiti i paqes për Ukrainën, në të cilin Rusia nuk ishte e ftuar, vazhdoi në qytetin zviceran të Burgenstock.
Presidentja zvicerane Viola Amherd tha se nga samiti pret hapat e parë konkretë drejt paqes.
Të shtunën, para fillimit të samitit, ajo saktësoi se vetëm tre pika të planit të paqes do të jenë në axhendën e samitit: siguria bërthamore, siguria ushqimore dhe çështjet humanitare – të burgosurit e luftës dhe kthimi i fëmijëve ukrainas nga Rusia.
Presidenti ukrainas Volodymyr Zelensky tha në samit se Ukraina do t’i paraqesë Rusisë masa konkrete për të arritur një zgjidhje paqeje në samitin e dytë të paqes.
“Rusia nuk është e interesuar për paqen”
Zelensky tha se Rusia nuk është e interesuar për paqen dhe se pjesëmarrësit e samitit duhet të vendosin së bashku se si të arrijnë paqen “në një mënyrë vërtet të qëndrueshme” dhe në përputhje me Kartën e Kombeve të Bashkuara, raporton Kyiv Independent.
Zëvendëspresidentja amerikane Kamala Harris, deklaroi se presidenti Putin, i cili i prezantoi kushtet për negociata të premten, nuk ishte ftuar në bisedimet e paqes, por, siç tha ajo, në dorëzimin e Ukrainës.
Harris tha se SHBA do të vazhdojë të punojë për të arritur një paqe të drejtë dhe të qëndrueshme, bazuar në parimet e Kartës së Kombeve të Bashkuara dhe vullnetin e popullit të Ukrainës.
“Problemi global”
Presidenti francez Emmanuel Macron deklaroi se lufta në Ukrainë është një problem global, duke shtuar se temat kryesore të konferencës rreth së cilës është e rëndësishme të mblidhen të gjithë liderët botërorë janë “siguria ushqimore, siguria bërthamore dhe çështjet humanitare”.
Kryeministri britanik Rishi Sunak ka thënë se Putini nuk është i interesuar për paqen dhe ka nisur një fushatë diplomatike kundër samitit në Zvicër.
Rusia e hodhi poshtë samitin si humbje kohe dhe në të nuk merr pjesë as Kina, e cila theksoi se bisedimet e paqes nuk kanë asnjë kuptim nëse Rusia dhe Ukraina nuk marrin pjesë në to.
Rusia nuk ishte e ftuar
Nëntëdhjetë vende dhe organizata kanë aplikuar deri më tani për të marrë pjesë në samitin e paqes në Ukrainë, të cilin Zvicra po e mban nga 15 deri më 16 qershor.
Rusia nuk ishte e ftuar në samitin që po mbahet në Zvicrën qendrore, por qeveria tha në një deklaratë se takimi do të synojë të “përcaktojë bashkërisht një plan” se si të përfshijë Moskën dhe Kievin në procesin e ardhshëm të paqes, transmeton Reuters.
Në janar, Zvicra ra dakord të organizojë samitin me kërkesë të presidentit ukrainas Volodymyr Zelensky dhe u përpoq të mbledhë mbështetje midis vendeve që kanë marrëdhënie më të mira me Moskën sesa fuqitë kryesore perëndimore.
Pritësi i samitit njoftoi se qëllimi i takimit do të jetë “përcaktimi i përbashkët i një harte rrugore” se si të përfshihen Moska dhe Kievi në procesin e ardhshëm të paqes. /tesheshi.com/
