Italia përsëriti kundërshtimin e saj ndaj planeve evropiane për të ndaluar shitjen e makinave të reja me benzinë dhe naftë në 12 vjet. Ministri i Transportit Matteo Salvini e quajti kalimin e shpejtë të planifikuar në automjetet elektrike “vetëvrasje” dhe një “dhuratë” për industrinë kineze, siç raporton Reuters.
Sipas agjencisë britanike, rregullat e miratuara nga Parlamenti Evropian në fillim të kësaj jave do t’u kërkojnë prodhuesve të makinave që të eliminojnë plotësisht emetimet e dioksidit të karbonit (CO2) nga makinat e reja deri në vitin 2035, gjë që rrjedhimisht do ta bënte të pamundur shitjen e makinave të reja që funksionojnë me lëndë djegëse fosile(naftë dhe benzinë).
“Ne të gjithë kujdesemi për ujin, cilësinë e ajrit dhe një mjedis më të pastër, por kjo nuk do të thotë të pushojmë nga puna miliona punëtorë dhe të mbyllim mijëra kompani. Fundamentalizmi ideologjik i energjisë elektrike është vetëvrasje dhe një dhuratë për Kinën”, tha Salvini.
Reuters kujton se plani për të ndaluar emetimet e CO2 ka shkuar keq në Itali, ku industria e makinave, e udhëhequr nga kompanitë FIAT dhe Alfa Romeo, është ende e fokusuar kryesisht në teknologjinë e motorëve me djegie të brendshme.
Kundërpropozimi italian
Zyrtarët italianë kanë thënë se nevojiten më shumë kohë dhe burime për të mundësuar një tranzicion “të qetë” dhe pa dhimbje te makinat elektrike.
“Italia do të paraqesë një kundërpropozim dhe përfshin një kufi për reduktimin e emetimeve të CO2 në 90 për qind, gjë që do t’i jepte industrisë së automobilave një shans për t’u përshtatur më mirë,” tha ministri i Jashtëm italian Antonio Tajani.
Sipas të dhënave të shoqatës italiane të automobilave ANFIA, shitjet e makinave elektrike në vend ranë me 27 për qind dhe ato përbëjnë vetëm 3.7 për qind të makinave të reja të regjistruara.
Reuters kujton se vendet e BE-së arritën një marrëveshje në parim për ndalimin e makinave me motorë me djegie të brendshme në tetor të vitit të kaluar, por se ajo ende duhet të miratohet zyrtarisht. /tesheshi.com/
