India ka ndaluar eksportin e një pjese të konsiderueshme të produktit të saj më të rëndësishëm – orizit, i cili do të përgjysmojë furnizimin e këtij ushqimi nga ky vend, i cili është eksportuesi më i madh botëror.
Një veprim i tillë shkaktoi frikën e paqëndrueshmërisë së vazhdueshme në tregjet globale të ushqimit, raportoi Reuters.
Qeveria e Delhit njoftoi një ndalim të eksporteve të orizit të bardhë, përveç basmatit, pasi çmimet e shitjes me pakicë të drithit u rritën me tre për qind në një muaj pasi me vonesë, por shirat e dendur të musonit bënë kërdi në të mbjellat.
India përbën më shumë se 40 për qind të eksporteve botërore të orizit dhe stoqet e ulëta me eksportues të tjerë nënkuptojnë se çdo reduktim i furnizimeve mund të rrisë çmimet e ushqimeve, të cilat tashmë janë rritur nga lufta në Ukrainë dhe moti i paqëndrueshëm.
“Për të siguruar disponueshmërinë e duhur të orizit të bardhë jo-basmati në tregun indian dhe për të moderuar rritjet e çmimeve të brendshme, qeveria e Indisë ka ndryshuar politikën e saj të eksportit,” njoftoi Ministria e Ushqimit e Indisë, duke vënë në dukje se çmimi me pakicë është rritur me 11.5 për qind gjatë 12 muajve të fundit.
Kjo kategori, oriz i bardhë dhe i thyer, përbënte pothuajse gjysmën e eksporteve të orizit të Indisë vitin e kaluar. Orizi i zier, i cili përfaqësonte 7.4 milionë tonë eksporte në vitin 2022, nuk përfshihet në ndalim.
Orizi është ushqimi kryesor për më shumë se tre miliardë njerëz, dhe pothuajse 90 për qind e kulturave intensive me ujë prodhohen në Azi. /tesheshi.com/
