Nga Blendi Gashi
Të premten bëhen saktësisht një javë kur opozitës kosovare ju larguan tendat dhe pëkrahësit që po qëndronin “ditë e natë”, para Qeverisë dhe Kuvendit me kërkesë dorëheqjen e qeverisë aktuale.
Por që nga ajo ditë, opozita e bashkuar ka rënë në gjumë të thellë pasi nuk ka dalë me një qëndrim zyrtar nëse do t’i rikthej ose jo tendat në shesh për të vazhduar kundërshtimin deri në arritjen e qëllimit, shkuarjen në zgjedhje të reja.
VV, AAK, e NISMA është pak e besueshme se mund të njoftojnë këtë javë se ç’rrugë do të ndjekin, pasi kreu i Vetëvendosje-s Visar Ymeri është arrestuar nga policia dhe nuk ka ende një vendim për të.
Krejt çfarë thonë për momentin eksponentë të opozitës së bashkuar, është se kundërshtimi i dy marrëveshjeve të dëmshme për Kosovën, Asociacionit dhe Demarkacionit dhe i koalicionit qeverisës do të vazhdojë më protesta dhe mënyra tjera të reagimit, por që nuk tregojnë asgjë më shumë.
Deputetja e VV-së, Albulena Haxhiu, e cila gjendet në “arrest shtëpiak”, thotë se kundërshtimi i partive opozitare është i domosdoshëm, andaj protestat do të vazhdojnë dhe do të jenë edhe më të fuqishme.
“Gjatë këtyre ditëve ne do t’i bëjmë të ditura veprimet e detajuara të opozitës. Nuk ka alternativë, ky regjim diktatorial do heqet.
Për shkak të qëndrimit në “arrest shtëpiak” nuk kam qenë e përfshire në aksion e tendave. Përveç protestave, ende nuk i kemi vendosur se cilat do të jenë aksionet kombinuese”, ka thënë Haxhiu, për tesheshi.com.
Nënkryetari i AAK-së, Ahmet Isufi, thotë se me vet faktin se tendat u hoqën dhunshëm nga policia edhe pse kishin leje të qëndronin, doli në pah arroganca qeveritare.
Isufi thotë se opozita e bashkuar është duke shqyrtuar organizimin e protestave gjithëpopullore deri në rrëzimin e qeverisë.
“Duke qenë përballë një regjimi diktatorial i cili suspendon, arreston, burgos, tërheq zvarrë deputetët e opozites nuk mund të ketë normalitet në Kuvend pa dhënë llogari shkelësit e Kushtetutës. Në ditët në vijim do t’i bëjmë publike format dhe veprimet tona”, ka thënë Isufi për tesheshi.com.
Deputetja e NISMA për Kosovën, Valdete Bajrami, nuk ka dhënë detaje se kur mund të jenë organizimet e radhës së opozitës kundër qeverisë.
“Ne, opozita e bashkuar shumë shpejt do të dalim me datën e protestës së radhës dhe mënyrën e saj dhe gjithësesi do të ju njoftojmë me kohë”, ka deklaruar Bajrami për tesheshi.com.
Për katë “ditë e net” me radhë, opozita kosovare qëndroi në tendat e ngritura në sheshin kryesore të Prishtinës me kërkesë largimin e qeverisë aktuale, por pa rezultat.
Ditën që Thaçi u kurorëzua president, tendat u hoqën nga policia, e ndërkohë, prej asaj dite opozita nuk ëhstë ndjerë, veç faktit që e quan antikushtetues zgjedhjen e Thaçit, e që për këtë do e çojë në Kushtetuese.
Tjetër zhvillim është dhe arrestimi i Visar Imerit, por që u kalua si diçka rutinore.
Duket një opozitë e dorëzuar, por nuk dihet nëse kjo do vazhdojë gjatë. /tesheshi.com/
