Deklarata e Edi Ramës tek emisioni i ri i Sokol Ballës se “Kosova gjendet para një qorrsokaku”, mësohet se ka pasur një shtytje nga disa kancelari të rëndësishmë perëndimore.
“Jam shumë i shqetësuar për Kosovën, kthimi i një debati për politikë të brendshme siç është demarkacioni me Malin në Zi në një politikë qeveritare, rrezikon shumë Kosovën. Në vend që të përqëndrohen në bisedimet me Serbinë, Kosova po përplaset me ata që e krijuan Kosovën si shtet. Situata është shumë, shumë e rrezikshme”, deklaroi Rama, i cili pak a shumë këto qëndrime i ka mbajtur edhe në takimet që ka pasur në Tiranë me homologun e tij të Kosovës, Ramush Haradinaj por edhe me presidentin Hashim Thaçi.
Madje ka pasur disa herë diskutime në nivele të ndryshme.
Menjëherë pas krijimit të qeverisë “Haradinaj”, në Tiranë ka mbërritur numri dy dhe shefi i diplomacisë së Kosovës, Behgjet Pacolli, i cili ka raporte të afërta miqësore me kryeministrin shqiptar.
Rama ka lobuar me Pacollin që ta këshillonte Ramushin që të votonte sa më shpejt Demarkacionin.
Pacolli, nga ana e tij, ka marrë përsipër që të nisë një proces mbushamendjeje me shefin e tij të Qeverisë, por në fund s’ia ka dalë dhe këtë mesazh nuk e ka përcjellë vetëm në Tiranë, por edhe në qarqe diplomatike. Atëherë, Rama ka folur personalisht me Haradinajn që të miratojë sa më shpejt demarkacionin.
Por, mësohet se Ramushi i ka thënë se këtë çështje do ta negociojë vetë me ndërkombëtarët.
Në këtë moment nuk pa pasur më diskutime, por që kur çështja është mbarsur edhe me Gjykatën Speciale, atëherë Edi Rama ka folur sërish me homologun e tij. Dhe pikërisht kur ka parë që fjalët i ka marrë era, atëherë qëndrimet i ka thënë publikisht.
Herën e parë e ka mbajtur qwndrimin në “Top Channel” dhe herën e dytë e ka përsëritur njw natw mw parw në “Real Story”.
Siç mësohet, edhe në diskutimet që Rama ka pasur me Hashim Thaçin, me të cilin ka raporte më të afërta, ky i fundit i ka folur për qëndrimin “sovran” të kryeministrit Ramush Haradinaj, i cili për këto dy çështje ka hyrë vetë garant dhe nuk ka pranuar ndërhyrje nga askush.
Situata ka qenë aq problematike, sa mësohet se Rama ka menduar se një rol më i madh i presidentit të Republikës Ilir Meta mund të ishte më efektiv, jo vetëm nga posti i lartë institucional, por edhe nga raportet që Meta ka me Ramush Haradinajn.
Kreu i shtetit shqiptar ka shkuar dy herë në Kosovë në vizita jo formale, ndërkohë që është takuar edhe në Tiranë me kryeministrin e Kosovës me rastin e dorëzimit të pasaportës shqiptare.
Ai rast, nuk ishte gjë tjetër veçse një sinjal i lëshuar në Kosovë por edhe tek faktori ndërkombëtar se Tirana po ndikon që Haradinaj të kalojë demarkacionin.
Mësohet se negociatat e Metës me Ramushin kanë pasur efektivitet dhe pritet që së shpejti situata të qartësohet, duke e kaluar ligjin në Kuvend. /tesheshi.com/
