Pas një takimi me Presidentin ukrainas Volodymyr Zelensky të enjten, më 15 maj 2025, Presidenti turk Rexhep Tajip Erdogan tha se Turqia do të ishte e gatshme të priste udhëheqësit e Rusisë dhe Ukrainës për bisedime kur të jenë gati, njoftoi Drejtoria e Komunikimit e Presidencës Turke.
Erdogan theksoi se faza aktuale e luftës kërkon një zgjidhje përmes negociatave të drejtpërdrejta dhe theksoi nevojën urgjente për të arritur një terren të përbashkët për të parandaluar humbjet e mëtejshme të jetëve.
Ai e përshkroi këtë moment si një mundësi historike për të nisur negociatat e paqes dhe konfirmoi mbështetjen e fortë të Turqisë për dialogun në nivel teknik dhe udhëheqës.
Si u bë Erdogan një lojtar kyç në negociata?
Edhe pse negociatat dështuan, nuk pati mungesë suksesi për Presidentin Erdogan.
Me këtë, ai konfirmoi ndikimin e tij dhe besimin si të Ukrainës ashtu edhe të Rusisë në negociata, ndërsa bota pret që të arrihet një paqe historike midis Vladimir Putinit dhe Volodymyr Zelenskyt.
Nuk është asgjë e re që Turqia e ka pozicionuar veten si një lojtare e rëndësishme në skenën ndërkombëtare dhe shpesh ka luajtur një rol kyç, si në ngjarjet para dhe gjatë përmbysjes së Presidentit sirian Bashar Al-Assad, dhe tani mban lidhje të ngushta me liderin e ri sirian Ahmed al-Sharaa, të cilat me siguri do të fitojnë dimensione më të mëdha pasi Donald Trump njoftoi heqjen e sanksioneve ndaj Sirisë.
Çfarë është e rëndësishme për Turqinë?
Edhe pse deri më tani Erdogan ka luajtur kartën e neutralitetit si me Rusinë ashtu edhe me Ukrainën, dhe ka fituar bindjet e të dyja palëve duke siguruar që Turqia të gëzojë besimin e Putinit dhe Zelensky-t, Erdogan ende duket se ka plane pas negociatave për vendin e tij.
Vladimir Putin dhe publiku rus e konsiderojnë Erdoganin si një ndërmjetës të ndershëm, dhe kjo u parapri nga një bashkëpunim i qartë midis dy vendeve, madje edhe pas fillimit të agresionit rus kundër Ukrainës, kur Turqia nuk iu bashkua sanksioneve perëndimore kundër Rusisë.
Le të mos e injorojmë faktin se Volodymyr Zelensky e ka vizituar Turqinë disa herë gjatë viteve të fundit, kryesisht për shkak të furnizimit me armë të Ukrainës, veçanërisht të droneve Baryaktar që janë bërë çelësi i rezistencës ushtarake ndaj ushtrisë ruse në tokën ukrainase.
Me suksesin e negociatave, Erdogan mund të fitojë për Turqinë, përveç sigurisë tokësore të dy vendeve ndërluftuese, një pjesë të sigurisë detare në Detin e Zi, e cila me siguri do të fitojë një dimension të ri si territor nëse Rusia mban territoret e Ukrainës.
Për Turqinë, kjo do të thotë mbijetesa e rrugës tregtare dhe një garanci e rëndësishme sigurie që do të shënojë një fluks më të madh të anijeve turke.
Çfarë na pret?
Pozicioni i fuqishëm diplomatik i Rexhep Tajip Erdogan do të bëhet edhe më i theksuar si një burrë shteti me përvojë, i cili e ka vendosur veten si një lojtar serioz në bordin gjeopolitik, veçanërisht me sukseset e fundit ku veçon eliminimi i militantëve kurdë (PKK).
“Edhe nëse bisedimet e paqes dështojnë në Stamboll, Erdogani prapë merr meritat. Atij i pëlqen që emri i tij të jetë i stampuar pranë marrëveshjes së paqes”, tha Onur Isci, profesor i asociuar i marrëdhënieve ndërkombëtare në Universitetin Kadir Has. /tesheshi.com/
