Nga Bashkim Kastrati
Siç duket pazaret rreth krijimit të qeverisë Haradinaj kanë qenë të vështira. Duke marrë parasysh se janë disa parti që e përbëjnë koalicionin qeveritar, është dashur që të plotësohen egot e secilës. Madje edhe partitë e vogla si AKR-ja e Behgjet Pacollit ka kërkuar shumë poste, po për faktin se votat e këtij subjekti kanë qenë determinuese për krijimin e qeverisë.
Kryeministri i sapozgjedhur Ramush Haradinaj gjatë fushatës zgjedhore pati deklaruar se Kosova ka nevojë që ta zvogëlojë kabinetin qeveritar dhe se nuk ka nevojë që të ketë aq shumë ministri, disa prej tyre duhet të bashkohen me njëra-tjetrën, pasi fushat që i kanë përsipër janë pothuajse të ngjashme.
Por ky zvogëlim nuk ndodhi, përkundrazi u shtua edhe një ministri, ajo e zhvillimit rural, fushë me të cilën deri më tani ka qenë tek Ministria e Bujqësisë.
Negociatat për krijimin e qeverisë siç shihet janë karakterizuar edhe me ndarje të shumta të posteve. Që nga dje Kosova ka plotë pesë zëvendëskryeministra.
Ata janë: Behgjet Pacolli, Enver Hoxhaj, Fatmir Limaj, Dalibor Jevtiq, Dardan Gashi. Të gjithë të lartcekurit janë pjesë e partive politike, parti këto që kanë mandate në Kuvendin e Kosovës, por e çuditshme duket prania e Dardan Gashit aty. Pse u emërua ai në këtë pozicion, kur nuk ka asnjë parti politike, kur nuk ka dalë të matet fare në zgjedhje? Përveç këtij posti ai është emëruar edhe Ministër i Diasporës.
Javëve të fundit është raportuar se Dardan Gashi ka qenë ndërmjetësues i Haradinajt për të bindur deputeten e LDK-së Teuta Rugova që ta votojë Haradinajn për kryeministër dhe Kadri Veselin për kryeparlamentar. Ajo në seancat e kaluara ka vepruar dhe votuar ndryshe nga grupi parlamentar i LDK-së dhe nuk ka qëndruar pjesë e grupit parlamentar. Vinte dhe shkonte me PANIN, kur këta të fundit mungonin, as ajo nuk vinte. Ndërsa dje nuk u duke fare në parlament, pasi që vota e saj nuk ishte më vendimtare.
Ja sa do t’i kushtojnë zv.kryeministrat buxhetit të Kosovës
Duke marrë parasysh rolin dhe kompetencat e një pozite të tillë, shtrohet pyetja se çfarë do të bëjnë dhe përse i duhen Kosovës aq shumë zëvendëskryeministra? Përgjigjen për këtë ndoshta në ditët në vijim do të na jap kryeministri Haradinaj.
Duhet cekur se paga bazë e një zv.kryeministri është 1100 euro, por ata kanë edhe dieta të majme për aktivitetet e tyre që do t’ua shtojë të ardhurat. Pra vetëm zv.kryeministrat do t’i kushtojnë taksapaguesve të Kosovës së paku 66 mijë euro në vit. Kjo është sa i përket pagës së tyre bazë. Këtyre shpenzimeve u shtohen drekat dhe darkat, dietat, udhëtimet jashtë vendit, veturat, shoferët etj.
Ndërkaq, kabineti qeverisës Haradinaj vlerësohet si i panevojshëm. Janë plotë 21 Ministri, ndërsa secila pritet të ketë dy deri në tre zëvendësministra. Numri i tyre pritet të jetë rreth 50, ndërsa ata përveç pagës dhe dietave, do të shpenzojnë paratë e qytetarëve edhe për vetura e shofer, asistentë, telefon, udhëtime, dreka e darka etj.
Ndërkaq, në të gjitha mandatet e kaluara qeverisëse nuk është vë në pah se një zëvendësministër ka kryer ndonjë punë të caktuar në interes të vendit, përkundrazi zv.ministrat janë zënë duke keqpërdorur paranë publike. Thjeshtë ata emërohen nga shefat e partive për t’i rehatuar bashkë partiakët e tyre.
Ndryshe, kabineti qeveritar i Ramush Haradinaj po krahasohet edhe me shtetin më të populluar në botë, Kinën. Kosova me rreth 2 milionë banorë ka 21 ministri, 5 zëvendëskryeministra dhe pritet t’i ketë rreth 50 zëvendësministra. Derisa Kina, që ka 1.4 miliardë banorë, apo rreth 800 herë më shumë se shteti i vogël evropian, ka vetëm katër Ministri më shumë se Kosova. Kjo fuqi e madhe ekonomike nuk e ka “luksin” që të emërojë pesë zv.kryeministra, por i ka katër të tillë. /tesheshi.com/
