PS po i rikthehet vizionit politik të para 1 prillit 2013-të, duke shfaqur pendesë për aleancën me LSI, kur moralin si armë drejt pushtetit e zëvëndësoi me aritmetikën e votave duke bërë pajtim e më pas pakt me Ilir Metën. Sinjalin e ka dhënë Saimir Tahiri, njeriu që e ka nisur tashmë fushatën në Tiranë, gjatë një takimi në Paskuqan e Babrru.
“Ne nuk duam një koalicion për të fituar. Ne duam një koalicion për të punuar. Ne nuk duam një koalicion për të mbledhur vota. Ne duam një koalicion për të punuar pas 18 qershorit bashkë me shqiptarët, për Shqipërinë që duam. Disa duan “çadër” në pushtet. Disa e duan në tavolinë. Askush nuk do përgjegjësi për të bërë punë. Askush nuk jep llogari për punët që nuk ka bërë”, ka deklaruar Tahiri.
Ish-kreu i Rendit, i cili konsiderohet viktimë e LSI-së, ka shigjetuar këtë forcë politike në një formë origjinale, duke e konsidseruar përgjegjëse për llojin e qeverisjes mbi 20-vjeçare të vendit.
“Në 18 qershor ju do vendosni nëse këtë vend do e marrin në dorë të rinjtë për ta qeverisur të rinjtë apo do vazhdojë të mbetet në dorën e atyre që e mbajtën peng për 20 e kusur vite. Që ndjenjën në sipërfaqe për 20 e kusur vite e që kurrë nuk bënë një punë, përveçse të rrinin në ekuilibër, të mbanin njëri – tjetrin në kurriz të popullit. Në 18 qershor do ketë zgjedhje. Dhe në 18 qershor duhet të shkojmë në zgjedhje bashkë”, theksoi Tahiri, duke rendit kështu drejt rithemelimit të “aleancës me popullin”, aktive deri para 1 prill të vitit 2013, ku më pas iu zgjat dora e pajtimit LSI-së, akt që shkërmoqi gjithë ngrehinën morale të ngritur në 8 vjet opozitë. /tesheshi.com/
