Një grup deputetësh të Partisë Socialiste i kërkuan Prokurorisë së Përgjithshme të nisin hetimet ndaj deputetot opozitar, Flamur Noka, me akuzën e fshehjes së të dhënave të vetëdeklarimit.
Në kërkesën zyrtare drejtuar Prokurorisë së Përgjithshme, deputetët socialistë theksojnë se kolegu i tyre demokrat nuk ka treguar se është ndaluar, i është vendosur një masë sigurie personale dhe është dëbuar nga një shtet i huaj.
Ligji për dekriminalizimin parashikon ndërprerjen e mandatit, shkarkimin dhe ndjekjen penale për të zgjedhurit nëse ai fsheh të dhënat dhe verifikimin e kryen Prokuroria e Përgjithshme.
PS-ja, prej disa ditësh kërkon hetim për ish-ministrin e Brendshëm, Flamur Noka.
“Ish-ministri i Brendshëm Flamur Noka akuzohet si spiun i shërbimeve sekrete serbe. Ai ka qenë i ndaluar dhe ka gënjyer në formularin që ka plotësuar vetë për dekriminalizimin. Në të njëjtën mënyrë duhet të veprohet për Alban Zenelin, deputetin e dënuar me burg, por edhe për Arben Ristanin, numrin dy të Partisë Demokratike, i dënuar gjithashtu me burg. Partia Socialiste i bën thirrje Prokurorisë së Përgjithshme që të përfshihet në hetimin e Flamur Nokës, Arben Ristanit, Alban Zenelit e të çdokujt tjetër që përfaqëson këtë parti dhe që ka probleme me dekriminalizimin”, deklaroi deputeti socialist, Alfred Peza.
/tesheshi.com/
