Qeveria “Rama2” u miratua në Kuvend me 78 vota, 4 më shumë se numri i deputetëve që ka grupi parlamentar socialist. Votimi u bë i hapur, ashtu sikundër e përcakton edhe rregullorja e Kuvendit. Por cilët ishin deputetët që pa qenë pjesë e grupit socialist votuan pro qeverisë?
Sipas të dhënave nga sekretaria e Kuvendit, pro votuan 3 deputetët e PDIU-së dhe Tom Doshi nga PSD.
Kjo ishte diçka e pritshme referuar edhe deklaratave të mëparshme në mbështetje të qeverisë “Rama2” qoftë nga deputetë të PDIU ashtu edhe nga Tom Doshi. PDIU ishte njëra nga partitë që në fushatë konsiderohej si pjesë e tepsisë.
Pas 25 qershorit, megjithëse jashtë tepsisë së pushtetit, duket se ligjvënësit e kësaj partie, për shkak edhe të raporteve të mira me kryeministrin, kanë ngritur kartonat pro duke i dhënë një garanci më shumë Edi Ramës.
Gjithsesi, “Rama2” pati dy vota më pak se votimi për zgjedhjen e Gramoz Ruçit në postin e kryetarit të Kuvendit, vota që i përkisnin dy deputetëve demokratë.
Ndoshta po të ishte një votim i fshehtë edhe qeveria do të mund të merrte 80 mandate pro, aq sa morri edhe Ruçi.
Nëse Rama arrin të ruajë këtë kuotë deputetësh në mbështetje të tij, është vetëm 6 vota larg asaj që quhet shumicë e cilësuar, 84 mandate, por mbetet ende larg kuotës së 94 votave që duhen për ndryshime kushtetuese. /tesheshi.com/
