Më shumë simbolike se popullore, po zhvillohet protesta e organizatave të shoqërisë civile para kryeministrisë. Ata kanë vendosur një tra për të simbolizuar doganën apo edhe pankarta që shkruanin “më arrestoni mua”.
Ndërkohë, prania e policisë ka qenë mjaft e paktë përpara selisë së Kryeministrisë, madje s’ka pasur as gardh.
Thelbi i simbolikës së protestës së organizuar nga nisma-thurrje, një shoqatë e drejtuar nga Besjan Pesha, një ish-mjaftist që më ppas u aktivizua në LSI, kanë qenë PPP-të.
“Boll më me konçensione dhe arrogancë”, ka qenë një nga parrullat. Ndërkaq, në fjalimet që po mbahen ka pasur sulme ndaj kryeministrit dhe akuza për korrupsion.
Besjan Pesha, në fjalën e tij akuzoi mediat se nuk kanë transmetuar protestën.
“Nuk mund të vazhdohet më kur transmetohet live kryeministri me takime fake dhe jo qytetarët”, tha Pesha.
Ai bëri thirrje për të bojkotuar mediat që kanë bojkotuar protestën. Por kreu i nismës-thurrje ishte më i irrituar nga qytetarët që nuk i janë bashkuar protestës.
“Çfarë po prisni? Çfarë po bëni? E keni gabim, sepse taksat nuk janë as të majta e as të djathta”, tha Pesha. /tesheshi.com/
