Protestat në Podgoricë: Kërkojnë tërheqjen e Ligjit për President dhe zgjedhje të parakohshme
Të martën në mbrëmje, para Kuvendit të Malit të Zi në Podgoricë u mbajt protesta qytetare e quajtur “Ima Nas”, me të cilën u kërkuan tërheqjen e Ligjit për President dhe zgjedhje të jashtëzakonshme parlamentare.
Mijëra qytetarë u mblodhën në protestë, duke mbajtur flamuj kombëtarë malazezë dhe duke kënduar këngë malazeze. Të tubuarit mbanin pankarta ku shkruhej “Ndaloni mbjelljen e urrejtjes”, “Ne jemi këtu, nuk do të japim Kushtetutën, ne duam zgjedhje”, “Ne jemi këtu për Malin e Zi, për BE!”, “Nuk kemi më zgjidhje, shkojmë në zgjedhje!”.
Në fillim të protestës kërkesat e qytetarëve i lexoi Nebojsha Mrvaljeviç, drejtor ekzekutiv i forumit të qytetarëve të lirë “Luça”, në organizim të të cilit po mbahet protesta.
“Kërkojmë që të parandalohet rrëzimi i rendit kushtetues të Malit të Zi dhe të tërhiqen ndryshimet në Ligjin për Presidentin. Kërkojmë marrëveshje mes gjyqtarëve të Gjykatës Kushtetuese për të siguruar kushtet për mbajtjen e zgjedhjeve. Kërkojmë mbajtjen e zgjedhjeve të jashtëzakonshme parlamentare, në mënyrë që Mali i Zi sa më shpejt të ketë një qeveri përgjegjëse shtetërore, e cila do të mbrojë interesat e shtetit dhe do të punojë në të mirë të qytetarëve”, tha Mrvaljeviç. /tesheshi.com/
