Opozita realizoi protestën e radhës me bllokim rruge, ku kësaj here avancoi në numër qarqesh, plot 12, si dhe në orëzgjatje, nga një në dy.
Kreu demokrat Basha zgjodhi të ishte në Elbasan, ku nga rrethrrotullimi i Bradasheshit, përcolli mesazhin se zgjedhje me 30 qershor nuk do të ketë.
“Më datë 30 qershor nuk do të lejojmë krimin që dikton zgjedhjet. Zgjedhje pa opozitën e vendit nuk do të ketë. Proces zgjedhor fals asesi nuk do të ketë. Më 30 qershor do të bashkohen të gjithë shqiptarët për të caktuar datë zgjedhjesh, për të pasur qeveri tranzitore pa Ramën kryeministër”, tha Basha.
Ai paralajmëroi një protestë më 11 maj por jo me bllokim rruge, duke shprehur bindjen se atë ditë i gjithë populli do bashkohet kundër Ramës
“Shumica dërrmuese e shqiptarëve presin që ta flakin Ramën dhe shpurën e tij për të pasur parlament demokratik e afër njerëzve të thjeshtë”, tha Basha. /tesheshi.com/
