Ishte një protestë që nisi me tullumbace në qiell, me mbishkrimin “Rama ik”, por që sërish degjeneroi në akte dhune. Me të njëjtin itinerar, atë nga Kryeministria te Parlamenti, opozita PD-LSI iu kthye akteve militanteske shoqëruar me kapsolla e tymuese, ku nuk munguan dhe konfrontimet me policinë. Prej kësaj të fundit pati disa të lënduar, gjë që solli dhe reagimin e ministrit Lleshaj.
“Sapo përfundova një vizitë te punonjësit e policisë dhe protestuesit e plagosur. Është për të ardhur keq për këtë sulm të dhunshëm ndaj policisë. Përpjekja për të krijuar dhunë është e dështuar.
I bëj thirrje edhe Bashës, si personi i cili ka prodhuar 4 të vrarë dhe dhjetra të plagosur, të distancohet nga dhuna, ta izolojnë atë. Të gjithë të plagosurit kanë mbetur të lënduar nga mjetet piroteknike”, tha Lleshaj.
Ndërkohë, ashpër reagoi dhe Ambasada Amerikane.
“Ambasada e SHBA dënon dhunën që ndodhi gjatë protestës sonte. Grumbullimi paqësor dhe e drejta për të shprehur pakënaqësitë ndaj qeverisë janë shtylla të demokracive të shëndosha, por janë të drejta që duhen ushtruar paqësisht. Përdorimi i mjeteve piroteknike, sidomos kur vënë në shënjestër policinë, nuk është akt paqësor, është i papranueshëm dhe jodemokratik. Iu bëjmë thirrje të gjithë organizatorëve të protestës të ndalojnë aktet e dhunshme dhe të angazhohen në dialog konstruktiv”, u tha nga selia e Uashingtonit në Tiranë.
Pas saj reagoi dhe Ambasada Britanike.
“Mbretëria e Bashkuar mbështet të drejtën për të protestuar në mënyrë paqësore.
Nuk ka vend për dhunë apo pajisje shpërthyese në një protestë paqësore.
Organizatorët e protestës kanë përgjegjësinë për të mbajtur demonstrata të qeta dhe të ligjshme dhe policia ka përgjegjësinë për t’u përgjigjur në mënyrë proporcionale në ruajtje të rendin publik. Për të mirën e përbashkët, një protestë paqësore duhet të jetë prioritet”, u tha në deklaratë.
Ndërkohë, kreu demokrat Basha u përbetua se në protestën e radhës do flitet me tjetër gjuhë, një kërcënim i hapur prej tij në adresë të shefit të qeverisë.
“Është hera e fundit që drejtohem me fjalë dhe argumente, koha e fjalëve po mbaron, në protestën e radhës fjalën do ta ketë vetëm sovrani. E gjithë bota e di që ky është një pushtet i marrë nga dhuna e krimit. Ne nuk pranojmë pushtet të marrë me dhunë, harrojeni se do ta mbani pushtetin e dhunë, kthejani sovranit atë që i keni marrë, hapini rrugë zgjedhjeve të lira si e vetmja zgjidhje” u shpreh Basha. /tesheshi.com/
