Ishte radha e Tiranës sot ku të protestohej kundër arrestimit të Ramush Haradinajt, kreut të AAK-së dhe ish-një prëj krerëve të UÇK-së në zonën e Rrafshit të Dukagjinit, arrestuar ditë më parë nga autoritetet franceze. Nën moton “Drejtësi për Haradinaj” përfaqësues të forumeve politike rinore dhe organizatave rinore të shoqërisë civile u mblodhën para selisë së Ambasadës se Francës në Tiranë, duke iu bërë thirrje autoriteteve franceze që të mundësojnë lirimin e menjëhershëm të tij në Kosovë.
“Ne sot kërkojmë drejtësi dhe kemi besim se Franca do i thotë ‘JO’ Serbisë. Ne të gjithë bashkë kërkojmë lirimin e menjëhershëm të z. Haradinaj dhe rikthimin e tij në Kosovë”, u shprehën të rinjtë.
“Ne besojmë, u shprehen ata se mbajtja e z. Haradinaj në paraburgim në Francë, për shkak të një fletarresti të lëshuar nga Serbia në vitin 2004 është e papranueshme dhe një fyerje për çdo shqiptar”.
“Ne besojmë po ashtu se është detyrimi ynë që të reagojmë ndaj kësaj padrejtësie që nuk prek një individ, por çdo shqiptar, në Kosovë, Shqipëri, në diasporë. Prandaj ju ftojmë të na bashkoheni edhe ju për të ngritur zërin deri në lirimin e Ramush Haradinaj”, apeluan të rinjtë pjesëmarrës në protestë.
Ndërkohë, protesta të ngjashme u zhvilluan dhe në Shkup e Mitrovicë. /tesheshi.com/
